యశ్ రాజ్ ఫిల్మ్స్ తొలి హారర్ చిత్రంలో వరుణ్ ధావన్.. దర్శకత్వం ఎవరిదంటే?
సూర్య ఎంటర్‌టైన్‌మెంట్ డెస్క్: బాలీవుడ్ ప్రముఖ నిర్మాణ సంస్థ యశ్ రాజ్ ఫిల్మ్స్ తొలిసారిగా హారర్ జానర్‌లోకి అడుగుపెడుతోంది. ఈ ప్రతిష్టాత్మక చిత్రంలో బాలీవుడ్ హీరో వరుణ్ ధావన్ ప్రధాన పాత్రలో నటించనుండగా, రాకెట్ బాయ్స్ సిరీస్ ఫేమ్ అభయ్ పన్ను దర్శకత్వం వహించనున్నారు. ఇంకా టైటిల్ ఖరారు కాని ఈ హారర్ ప్రాజెక్ట్‌ను ప్రపంచవ్యాప్తంగా 2028 మార్చి 31న థియేటర్లలో విడుదల చేయనున్నట్లు చిత్రబృందం అధికారికంగా ప్రకటించింది.
రొమాంటిక్ సినిమాలు, యాక్షన్ డ్రామాలు, స్పై యూనివర్స్ చిత్రాలతో ప్రేక్షకులను అలరించిన యశ్ రాజ్ ఫిల్మ్స్ సంస్థ, ఇప్పుడు హారర్ జోనర్‌ను భారీ స్థాయిలో తెరకెక్కించేందుకు సన్నాహాలు చేస్తోంది. ఈ చిత్రానికి అభయ్ పన్ను దర్శకత్వంతో పాటు స్క్రీన్‌ప్లే కూడా అందిస్తున్నారు. ఓటీటీ వెబ్ సిరీస్‌లతో విశేష గుర్తింపు పొందిన అభయ్ పన్నుకు, ఈ సినిమా ద్వారా వెండితెర దర్శకుడిగా తొలి అవకాశం దక్కింది.
యశ్ రాజ్ ఫిల్మ్స్ ఛైర్మన్ ఆదిత్య చోప్రా మార్గదర్శకత్వంలో ఈ ప్రాజెక్ట్ రూపుదిద్దుకుంటోంది. సంస్థ సీఈఓ అక్షయ్ విధాని ఈ చిత్రాన్ని నిర్మిస్తున్నారు. వరుణ్ ధావన్‌కు ఇది యశ్ రాజ్ ఫిల్మ్స్ బ్యానర్‌లో రెండో సినిమా కావడం విశేషం. గతంలో 2018లో విడుదలైన సూయి ధాగా చిత్రంలో ఆయన ఈ సంస్థతో కలిసి పనిచేశారు.
ఇప్పటికే భేదియా వంటి హారర్ కామెడీ ప్రాజెక్టులతో అలరించిన వరుణ్ ధావన్, యశ్ రాజ్ ఫిల్మ్స్ తొలి హారర్ చిత్రంలో సరికొత్త కోణంలో కనిపించనున్నారని సినీ వర్గాల్లో ఆసక్తి నెలకొంది. ఈ సినిమా కథాంశం, ఇతర తారాగణం, సాంకేతిక నిపుణుల వివరాలను రానున్న రోజుల్లో ఒక్కొక్కటిగా ప్రకటించే అవకాశం ఉంది. భారతీయ సినిమాలో హారర్ అనుభవాన్ని కొత్త పుంతలు తొక్కించేలా ఈ చిత్రాన్ని తీర్చిదిద్దుతున్నట్లు నిర్మాణ సంస్థ వెల్లడించింది.
Also Read: న్యూజిలాండ్ టెస్ట్ సిరీస్‌కు గుర్నూర్ బ్రార్ ఎంపిక.. కుల్దీప్ యాదవ్‌పై బీసీసీఐ కీలక నిర్ణయం
