సెయింట్ ఆన్స్ పాఠశాలలో ఘనంగా బాలల దినోత్సవ వేడుకలు

సంగారెడ్డి;బాలలే దేశ భవిష్యత్తు.. వారి చిరునవ్వులే రేపటి సమాజానికి ఆశాకిరణాలని చాటిచెబుతూ సంగారెడ్డిలోని సెయింట్ ఆన్స్ పాఠశాలలో బాలల దినోత్సవ వేడుకలను ఘనంగా నిర్వహించారు. భారత తొలి ప్రధానమంత్రి పండిట్ జవహర్‌లాల్ నెహ్రూ జయంతిని పురస్కరించుకొని నిర్వహించిన ఈ వేడుకల్లో విద్యార్థులు ఎంతో ఉత్సాహంగా పాల్గొన్నారు.ఈ సందర్భంగా నెహ్రూ చిత్రపటానికి పూలమాలలు వేసి ఘనంగా నివాళులర్పించారు. విద్యార్థుల్లో సృజనాత్మకత, ఆత్మవిశ్వాసం, నాయకత్వ లక్షణాలను పెంపొందించే లక్ష్యంతో వివిధ సాంస్కృతిక కార్యక్రమాలు, నృత్యాలు, పాటలు, ప్రసంగాలు నిర్వహించారు. చిన్నారులు ప్రదర్శించిన ప్రతిభాపాటవాలు, కళా ప్రదర్శనలు అందరినీ ఆకట్టుకున్నాయి.అనంతరం విద్యార్థులకు వివిధ రకాల ఆటల పోటీలు నిర్వహించి, విజేతలుగా నిలిచిన వారికి బహుమతులు అందజేశారు.ఈ సందర్భంగా పాఠశాల ప్రధానోపాధ్యాయులు మాట్లాడుతూ.. ప్రతి బాల్యం అద్భుతమైన భవిష్యత్తుకు పునాది అని, ప్రతి చిన్నారిలోనూ అపారమైన ప్రతిభ దాగి ఉంటుందని అన్నారు. ఆ ప్రతిభను వెలికితీసేందుకు తల్లిదండ్రులు, ఉపాధ్యాయులు తగిన ప్రోత్సాహం అందించాలని సూచించారు. విద్యతో పాటు సంస్కారం, క్రమశిక్షణ, మానవీయ విలువలను నేర్పించడం ద్వారా పిల్లలను బాధ్యతాయుతమైన పౌరులుగా తీర్చిదిద్దవచ్చని పేర్కొన్నారు.వేడుకలను విజయవంతంగా నిర్వహించిన పాఠశాల ఉపాధ్యాయులు, విద్యార్థులు, సిబ్బందిని పాఠశాల కరస్పాండెంట్ కె. ఆంథోనీ రెడ్డి ప్రత్యేకంగా అభినందించారు. ఈ కార్యక్రమంలో ఉపాధ్యాయులు, విద్యార్థులు, పాఠశాల సిబ్బంది పాల్గొన్నారు.