*రోడ్డు వేయలేరా..బురదలోనే బతకాలా...?* *వైరా 11వ వార్డులో మాలపల్లి రహదారి అధ్వానం*. *వర్షం వస్తే బురద కష్టాలు..రాకపోకలకు తీవ్ర ఇబ్బందులు* *పట్టించుకోని అధికారుల తీరుపై కాలనీవాసుల ఆవేదన

*రోడ్డు వేయలేరా..బురదలోనే బతకాలా...?*

*వైరా 11వ వార్డులో మాలపల్లి రహదారి అధ్వానం*.                

*వర్షం వస్తే బురద కష్టాలు..రాకపోకలకు తీవ్ర ఇబ్బందులు*

*పట్టించుకోని అధికారుల తీరుపై కాలనీవాసుల ఆవేదన*

వైరా రూరల్ (సూర్య న్యూస్):-

రోడ్డు వేయలేరా..బురదలోనే బతకాలా..? అంటూ వైరా మున్సిపాలిటీ 11వ వార్డు సోమవరం ఎస్సీ కాలనీ (మాలపల్లి) ప్రజలు ప్రశ్నిస్తున్నారు. మున్సిపాలిటీ పరిధిలో ఉన్నప్పటికీ తమ కాలనీకి వెళ్లే ప్రధాన రహదారి కనీస సౌకర్యాలకు నోచుకోవడం లేదని ఆవేదన వ్యక్తం చేస్తున్నారు. ఇటీవల కురిసిన వర్షాలకు రహదారి పూర్తిగా బురదమయంగా మారి నడవడానికి కూడా వీలులేని దుస్థితి నెలకొంది.
రోడ్డుపై అడుగడుగునా గుంతలు, నిలిచిన వర్షపు నీరు, పేరుకుపోయిన బురదతో కాలనీవాసుల రాకపోకలు కష్టంగా మారాయి. ద్విచక్ర వాహనదారులు జారిపడే ప్రమాదం ఉండగా, పాఠశాలలకు వెళ్లే విద్యార్థులు, చిన్నపిల్లలు, వృద్ధులు తీవ్ర ఇబ్బందులు ఎదుర్కొంటున్నారు. రాత్రివేళల్లో ఈ మార్గంలో ప్రయాణించాలంటే ప్రాణాలు అరచేతిలో పెట్టుకోవాల్సిన పరిస్థితి ఏర్పడిందని స్థానికులు వాపోతున్నారు.
అత్యవసర సమయాల్లో ఆటోలు, ఇతర వాహనాలు సైతం కాలనీలోకి రావడానికి ఇబ్బందులు ఎదురవుతున్నాయని చెబుతున్నారు. ఏళ్ల తరబడి ఇదే సమస్య కొనసాగుతున్నా శాశ్వత పరిష్కారం చూపకపోవడంపై కాలనీవాసులు అసహనం వ్యక్తం చేస్తున్నారు. మున్సిపాలిటీ పరిధిలో నివసిస్తున్న తమకు కనీసం నడవడానికి అనువైన రహదారి కూడా లేకపోవడం ఏమిటని ప్రశ్నిస్తున్నారు.
ఇప్పటికైనా మున్సిపల్ అధికారులు, ప్రజాప్రతినిధులు స్పందించి తక్షణమే రహదారిపై గ్రావెల్ పోయించి తాత్కాలికంగా రాకపోకలకు అనుకూలంగా మార్చాలని, శాశ్వత పరిష్కారంగా సీసీ రోడ్డు నిర్మాణానికి నిధులు కేటాయించి పనులు చేపట్టాలని 11వ వార్డు సోమవరం ఎస్సీ కాలనీవాసులు డిమాండ్ చేస్తున్నారు. తమ సమస్యపై అధికారులు ఇకనైనా స్పందిస్తారా? లేక ప్రజలు బురద రోడ్డుపైనే ప్రయాణాలు కొనసాగించాలా? వేచి చూడాలి.