మోరీ గేట్ మార్కెట్‌లో 7000 కిలోల కల్తీ కోవా ధ్వంసం.. సీఎం రేఖా గుప్తా
సూర్య జాతీయ డెస్క్: పండుగల వేళ ప్రజారోగ్యంతో చెలగాటమాడే కల్తీ రాయుళ్లపై ఢిల్లీ ప్రభుత్వం ఉక్కుపాదం మోపింది. రాజధాని నగరం మోరీ గేట్ ప్రాంతంలోని ప్రసిద్ధ కోవా మార్కెట్‌లో ఆహార భద్రతా శాఖ నిర్వహించిన ఆకస్మిక తనిఖీల్లో సుమారు 7,000 కిలోల కల్తీ, దుర్వాసన వస్తున్న నాసిరకం కోవాను అధికారులు సీజ్ చేసి అక్కడిక్కడే ధ్వంసం చేశారు. దీపావళి తదితర పండుగల నేపథ్యంలో మార్కెట్లలో కల్తీ మిఠాయిలు, పదార్థాలు విక్రయించకుండా నిరోధించేందుకు ప్రభుత్వం చేపట్టిన విస్తృత తనిఖీల్లో భాగంగా ఈ భారీ ఆపరేషన్ జరిగింది.
ఈ తనిఖీ కార్యాచరణను ఢిల్లీ ముఖ్యమంత్రి రేఖా గుప్తా స్వయంగా క్షేత్రస్థాయికి వెళ్లి పరిశీలించారు. అధికారుల ఆపరేషన్ తీరును సమీక్షించిన అనంతరం ఆమె మాట్లాడుతూ, ప్రజల ఆరోగ్య పరిరక్షణ విషయంలో తమ ప్రభుత్వం ఎలాంటి రాజీ పడదని తేల్చి చెప్పారు. పండుగల సమయాల్లో ప్రజలకు సురక్షితమైన, నాణ్యమైన ఆహార పదార్థాలు అందించడం ప్రభుత్వ ప్రాథమిక బాధ్యత అని స్పష్టం చేశారు. ఎంతటి ప్రభావవంతమైన వ్యక్తులైనా కల్తీకి పాల్పడితే చట్టపరమైన కఠిన చర్యలు తప్పవని, బాధ్యులపై విచారణ జరిపి తగిన శిక్ష పడేలా చూస్తామని సిఎం హెచ్చరించారు.
మోరీ గేట్ కోవా మార్కెట్ ఆపరేషన్ సందర్భంగా ఆహార భద్రతా విభాగం నిపుణులు సేకరించిన 44 శాంపిళ్లలో మొబైల్ టెస్టింగ్ వ్యాన్ ద్వారా 35 శాంపిళ్లు ప్రాథమికంగా కల్తీ అయినట్లు తేలింది. మిల్క్ పౌడర్, వంట నూనెలు, బైండింగ్ ఏజెంట్లు కలపడం ద్వారా తయారైన ఈ నకిలీ కోవా మానవ శరీరానికి తీవ్ర హాని కలిగిస్తుందని అధికారులు వెల్లడించారు. ఆహార పదార్థాల సరఫరా వ్యవస్థలోకి ఈ కల్తీ కోవా చేరుకోకుండా ప్రభుత్వం అడ్డుకోగలిగిందని అధికారులు ప్రకటించారు.
పండుగల సీజన్ ముగిసే వరకు మరియు ఏడాది పొడవునా ఢిల్లీ వ్యాప్తంగా ఇటువంటి తనిఖీలు, దాడులు నిరంతరాయంగా కొనసాగుతాయని ముఖ్యమంత్రి రేఖా గుప్తా తెలిపారు. వ్యాపార లాభాల కోసం ప్రజల ప్రాణాలతో ఆటలాడుకునే వారిపై చట్టపరమైన చర్యలు తీసుకోవడమే కాకుండా, మార్కెట్లలో కల్తీ లేని వాతావరణాన్ని నిర్మించడమే తమ లక్ష్యమని చెప్పారు. ఈ మేరకు వ్యాపారులు కూడా ఆహార ప్రమాణాలు పాటించాలని, నిబంధనలు ఉల్లంఘిస్తే కఠిన చర్యలు ఉంటాయని ఆహార భద్రత శాఖ హెచ్చరికలు జారీ చేసింది.
