ప్రేమ్ నగర్ పాఠశాలను వెంటనే పునః ప్రారంభించాలి-విద్యార్థులు ఉన్న ఉపాధ్యాయుడు లేక మూత... ప్రజావాణిలో వినతి పత్రం సమర్పించిన కుల సంఘాల జేఏసీ జిల్లా చైర్మన్ పీక కిరణ్ మౌర్య

మహా ముత్తారం, మేజర్ న్యూస్,
జయశంకర్ భూపాలపల్లి జిల్లా మహాముత్తారం మండలంలోని ప్రేమ్‌నగర్ ప్రాథమిక పాఠశాలను వెంటనే పునఃప్రారంభించి, ఉపాధ్యాయుడిని నియమించాలని కుల సంఘాల జేఏసీ జిల్లా చైర్మన్ పీక కిరణ్ మౌర్య డిమాండ్ చేశారు. ఈ మేరకు భూపాలపల్లి కలెక్టరేట్‌లో నిర్వహించిన ప్రజావాణిలో అధికారులకు వినతిపత్రం అందజేశారు.
పాఠశాలలో విద్యార్థులు ఉన్నప్పటికీ, ఉపాధ్యాయుడిని మరో పాఠశాలకు డిప్యూటేషన్‌పై పంపించడంతో ఈ ఏడాది జూన్‌ నుంచి పాఠశాల మూతపడిందని తెలిపారు. దీంతో ప్రేమ్‌నగర్‌కు చెందిన పేద గిరిజన విద్యార్థులు విద్యకు దూరమయ్యే పరిస్థితి ఏర్పడిందని ఆవేదన వ్యక్తం చేశారు.
చిన్నారుల భవిష్యత్తును దృష్టిలో ఉంచుకుని అధికారులు వెంటనే స్పందించి పాఠశాలను పునఃప్రారంభించడంతోపాటు ఉపాధ్యాయుడిని కేటాయించాలని పీక కిరణ్ మౌర్య, ఐతే బాపు కోరారు.

రిపోర్టర్: మహ ముత్తారం, జయశంకర్ భూపాలపల్లి జిల్లా