ఎక్సైజ్ కానిస్టేబుల్ వసూళ్ల దందా!?

మంగపేట, మేజర్ న్యూస్, అక్రమ మద్యాన్ని అరికట్టాల్సిన ఎక్సైజ్ శాఖలోని కొందరు సిబ్బందే అక్రమ వసూళ్లకు పాల్పడుతున్నారనే ఆరోపణలు ములుగు జిల్లా మంగపేట మండలంలో తీవ్ర కలకలం రేపుతున్నాయి. మండలంలోని బెల్ట్ షాపుల వద్ద ఓ ఎక్సైజ్ కానిస్టేబుల్ వసూళ్లకు పాల్పడుతున్నట్లు ఆరోపణలు వినిపిస్తున్నాయి. మండలంలోని గ్రామాల్లో విచ్చలవిడిగా బెల్ట్ షాపులు నడుస్తున్నాయి. వాటిని అదుపు చేయాల్సిన ఎక్సైజ్ శాఖకు చెందిన ఒక కానిస్టేబుల్, దసరా పండుగ నేపథ్యంలో ఎక్సైజ్ శాఖకు మామూళ్లు ఇవ్వాలంటూ బెల్ట్ షాపుల నిర్వాహకులను బెదిరించి వసూళ్లకు పాల్పడుతున్నట్లు బెల్ట్ షాపుల నిర్వాహకులు బహిరంగంగా చెప్పుకుంటున్నారు. ఒక్కో బెల్ట్ షాపు నుంచి సుమారు 1000 రూపాయల నుంచి 2000 రూపాయల వరకు వసూలు చేసినట్లు ఆరోపణలు ఉన్నాయి. ఇవ్వని వారి షాపులపై కేసులు పెడతామని బెదిరింపులకు గురిచేస్తున్నారని కూడా ప్రచారం జరుగుతోంది. ఈ వసూళ్ల వ్యవహారంపై ఎక్సైజ్ ఉన్నతాధికారులు విచారణ జరిపించాలని, సంబంధిత కానిస్టేబుల్ పై చర్యలు తీసుకోవాలని మండల ప్రజలు డిమాండ్ చేస్తున్నారు.

రిపోర్టర్:, స్నేహకుమార్, మంగపేట, ములుగు జిల్లా