ఖేత్ బచావో అభియాన్‌లో రైతులకు అవగాహన

సూర్య జైనూర్ : సిర్పూర్ (యు) మండలంలో ఖేత్ బచావో అభియాన్‌లో భాగంగా వ్యవసాయ శాఖ అధికారులు ఏవో ఆనంద్, ఏఈవో శేఖర్ రైతులకు అవగాహన కార్యక్రమం నిర్వహించారు. ఈ సందర్భంగా నీటి వనరుల సంరక్షణ, భూగర్భ జలాల పరిరక్షణ, పంటల మార్పిడి, తక్కువ నీటితో పండించే పంటల సాగు ప్రాముఖ్యతను వివరించారు. రైతులు అందుబాటులో ఉన్న నీటిని పొదుపుగా వినియోగించుకోవాలని సూచించారు.

ప్రస్తుత పరిస్థితుల్లో నీటి వనరులను కాపాడుకోవడం ఎంతో అవసరమని అధికారులు తెలిపారు. అధిక నీరు అవసరమయ్యే వరి, మొక్కజొన్న వంటి పంటల సాగుపై స్థానిక నీటి లభ్యతను బట్టి నిర్ణయం తీసుకోవాలని సూచించారు. నీటి వినియోగాన్ని తగ్గించేందుకు శనగ సాగును విస్తృతంగా చేపట్టాలని, జొన్న వంటి చిరుధాన్యాల సాగుకు ప్రాధాన్యత ఇవ్వాలని కోరారు. పంటల మార్పిడి ద్వారా నేల సారాన్ని కాపాడుకోవడంతో పాటు సాగు ఖర్చులను తగ్గించుకోవచ్చని వివరించారు.రైతులు తమ ప్రాంతంలోని నేల స్వభావం, వర్షపాతం, నీటి లభ్యతను పరిశీలించి అనుకూలమైన పంటలను ఎంపిక చేసుకోవాలని సూచించారు. తక్కువ నీటితో పండే పంటలను సాగు చేయడం వల్ల నీటి వనరులపై ఒత్తిడి తగ్గుతుందని తెలిపారు. వ్యవసాయంలో నీటి పొదుపు పద్ధతులను పాటిస్తూ భూగర్భ జలాలను సంరక్షించాలని, భవిష్యత్ తరాలకు నీటి వనరులను అందించేందుకు ప్రతి రైతు బాధ్యతగా వ్యవహరించాలని అధికారులు పిలుపునిచ్చారు. నీటిని కాపాడుకుందాం.. భవిష్యత్ వ్యవసాయాన్ని సంరక్షించుకుందాం అనే సందేశంతో రైతులు ముందుకు సాగాలని కోరారు.