కొమురం భీమ్ ఆశయాలను సాధించాలి

సూర్య మంచిర్యాల టౌన్ : ఆదివాసీ హక్కుల పరిరక్షణకు ప్రభుత్వాలు ప్రత్యేక చొరవ చూపాలని వివిధ సంఘాల నాయకులు డిమాండ్ చేశారు.ఆదివాసీ వీరుడు కొమురం భీమ్ 86వ వర్ధంతి సందర్భంగా సోమవారం మంచిర్యాల జిల్లా కేంద్రంలోని బైపాస్ రోడ్డులో గల గిరిజన సంక్షేమ బాలుర వసతి గృహంలో ఆయన చిత్రపటానికి పూలమాలలు వేసి ఘనంగా నివాళులర్పించారు.ఈ సందర్భంగా నాయకులు మాట్లాడుతూ.. ఆదివాసీల హక్కులు, ఆత్మగౌరవం, స్వయం ప్రతిపత్తి కోసం జల్‌–జంగల్‌–జమీన్‌  నినాదంతో పోరాడిన కొమురం భీమ్ జీవితం నేటి తరానికి స్ఫూర్తిదాయకమన్నారు.అణిచివేతకు వ్యతిరేకంగా ఆయన సాగించిన పోరాటం చరిత్రలో చిరస్థాయిగా నిలిచిపోతుందన్నారు.కొమురం భీమ్ ఆశయాలను వర్ధంతి కార్యక్రమాలకే పరిమితం చేయకుండా ఆదివాసీలు ఎదుర్కొంటున్న భూ సమస్యలు, అటవీ హక్కులు, విద్య, వైద్యం, ఉపాధి, తాగునీటి సమస్యలను పరిష్కరించాలని కోరారు.గిరిజన ప్రాంతాల్లోని ప్రభుత్వ పాఠశాలలకు మౌలిక సదుపాయాలు కల్పించి, విద్యార్థులకు నాణ్యమైన విద్య అందించాలని అన్నారు.ఆదివాసీ సంస్కృతి, సంప్రదాయాలు, భాషలను పరిరక్షించడంతో పాటు రాజ్యాంగం కల్పించిన హక్కులను సమర్థవంతంగా అమలు చేయాలని డిమాండ్ చేశారు.ఆదివాసీ యువతకు విద్య, ఉద్యోగ, ఉపాధి అవకాశాలు కల్పించి వారి అభివృద్ధికి కృషి చేయాలన్నారు. కొమురం భీమ్ ఆశయాల సాధనే ఆయనకు అర్పించే నిజమైన నివాళి అని పేర్కొన్నారు.ఈ కార్యక్రమంలో తెలంగాణ విద్యార్థి ఉద్యమ వేదిక రాష్ట్ర కార్యదర్శి చిప్పకుర్తి శ్రీనివాస్, జాతీయ బీసీ విద్యార్థి సంఘం జిల్లా అధ్యక్షుడు పూరెల్ల నితీష్, జిల్లా కోయ సంఘం గౌరవ అధ్యక్షుడు నైతం లక్ష్మణ్, నస్పూర్ మండల అధ్యక్షుడు ఆత్రం సమ్మయ్య, విద్యార్థులు పాల్గొన్నారు.