అర్ణబ్ తుఫాను నేపథ్యంలో విద్యుత్ పునరుద్ధరణకు నెల్లూరు జిల్లా నుంచి 10 ప్రత్యేక బృందాలు

నెల్లూరు,  మేజర్ న్యూస్ :    అర్ణబ్ తుఫాను ప్రభావంపై ముందస్తు హెచ్చరికల నేపథ్యంలో, ఏపీఎస్‌పీడీసీఎల్ సీఎండీ శివ శంకర్ లోతేటి ఐఏఎస్   ఆదేశాల మేరకు తుఫాను ప్రభావిత ప్రాంతాల్లో విద్యుత్ సరఫరాను త్వరితగతిన పునరుద్ధరించేందుకు నెల్లూరు జిల్లా నుంచి 10 ప్రత్యేక విద్యుత్ బృందాలను డాక్టర్ బి.ఆర్. అంబేద్కర్ కోనసీమ జిల్లా అమలాపురానికి పంపించారు.  ఈ బృందాల్లో మొత్తం 100 మంది విద్యుత్ సిబ్బందితో పాటు నలుగురు డిప్యూటీ ఎగ్జిక్యూటివ్ ఇంజనీర్లు, ఆరుగురు అసిస్టెంట్ ఎగ్జిక్యూటివ్ ఇంజనీర్లు ఉన్నారు. తుఫాను కారణంగా విద్యుత్ లైన్లు, ఇతర విద్యుత్ వ్యవస్థలకు నష్టం వాటిల్లిన పక్షంలో వెంటనే మరమ్మతులు చేపట్టి, విద్యుత్ సరఫరాను పునరుద్ధరించేందుకు ఈ బృందాలు సేవలు అందించనున్నాయి. ఈ ప్రత్యేక బృందాలను నెల్లూరు జిల్లా సూపరింటెండింగ్ ఇంజనీర్ (ఆపరేషన్)  పి. సుధాకర్   జెండా ఊపి ప్రారంభించారు. తుఫాను ప్రభావిత ప్రాంతాల్లో ప్రజలకు అసౌకర్యం కలగకుండా విద్యుత్ పునరుద్ధరణ పనులను సమన్వయంతో, వేగవంతంగా చేపట్టాలని సూచించారు. ఈ కార్యక్రమంలో ఎగ్జిక్యూటివ్ ఇంజనీర్ (టెక్నికల్) అల్తాఫ్,  ఎగ్జిక్యూటివ్ ఇంజనీర్ నరేంద్ర రెడ్డి, డిప్యూటీ ఎగ్జిక్యూటివ్ ఇంజనీర్లు  చిన్నస్వామి నాయక్,  పి. చిన్నయ్య తదితరులు పాల్గొన్నారు.