పెండింగ్‌ ఎస్‌ఐఆర్‌ దరఖాస్తులను త్వరితగతిన పరిష్కరించాలి జిల్లా కలెక్టర్‌ ప్రతీక్‌ జైన్‌.
సంగారెడ్డి, :-- ఓటరు జాబితా ప్రత్యేక సమగ్ర సవరణ ప్రక్రియలో పెండింగ్‌లో ఉన్న పనులను త్వరితగతిన పూర్తి చేయడంతో పాటు, అర్హత కలిగిన ఓటర్ల వివరాలను క్షుణ్ణంగా పరిశీలించి పారదర్శకంగా ఓటరు జాబితాను సిద్ధం చేయాలని జిల్లా కలెక్టర్‌ ప్రతీక్‌ జైన్‌ అధికారులను ఆదేశించారు.సోమవారం హైదరాబాద్‌ నుంచి తెలంగాణ రాష్ట్ర ప్రధాన ఎన్నికల అధికారి సుదర్శన్‌ రెడ్డి అన్ని జిల్లాల కలెక్టర్లతో వీడియో కాన్ఫరెన్స్‌ నిర్వహించి, ఎస్‌ఐఆర్‌ ప్రక్రియ పురోగతి, ఫారం-6, 7, 8 దరఖాస్తుల పరిష్కారం, పెండింగ్‌ పనులపై సమీక్షించారు.కలెక్టరేట్‌ వీడియో కాన్ఫరెన్స్‌ హాల్‌ నుంచి జిల్లా కలెక్టర్‌ ప్రతీక్‌ జైన్‌, అదనపు కలెక్టర్లు టి.ఎల్‌. సంగీత, ఆర్. పాండు, సంబంధిత అధికారులు పాల్గొన్నారు.ఈ సందర్భంగా రాష్ట్ర ప్రధాన ఎన్నికల అధికారి సుదర్శన్‌ రెడ్డి మాట్లాడుతూ, ఫారం-6, 7, 8 దరఖాస్తులను నిర్దేశిత గడువులోగా పరిష్కరించాలని సూచించారు. ఎస్‌ఐఆర్‌ ప్రక్రియలో తప్పుగా మ్యాపింగ్‌ అయిన ఓటర్ల వివరాలను క్షుణ్ణంగా పరిశీలించి, నిబంధనల ప్రకారం అర్హతలను నిర్ధారించాలన్నారు.అనర్హులుగా గుర్తించిన ఓటర్ల విషయంలో అనర్హతకు గల కారణాలను స్పష్టంగా నమోదు చేయడంతో పాటు, అందుకు సంబంధించిన ఆధారాలు, పూర్తి వివరాలను రికార్డుల్లో భద్రపరచాలని సూచించారు. అనర్హులుగా గుర్తించిన ఓటర్ల వివరాలను మరోసారి క్షుణ్ణంగా పునఃపరిశీలించి, ఎలాంటి పొరపాట్లకు తావులేకుండా చర్యలు తీసుకోవాలని అధికారులను ఆదేశించారు.ఓటరు జాబితా సవరణ ప్రక్రియలో పారదర్శకత, నిబంధనల అమలు, ఖచ్చితత్వానికి ప్రాధాన్యతనిస్తూ పెండింగ్‌ పనులన్నీ సకాలంలో పూర్తి చేయాలని ఆయన సూచించారు.
