ఆధ్యాత్మిక శోభతో సత్యనారాయణ స్వామి ఆలయం

విశాఖపట్నం, సూర్య : పూర్వ మార్కెట్ ఇసుకకొండపై వేంచేసియున్న దేవాదాయ ధర్మాదాయ శాఖకు చెందిన శ్రీ రమా సహిత సత్యనారాయణ స్వామివారి దేవస్థానంలో ఆధ్యాత్మిక కార్యక్రమాలు సోమవారం వైభవంగా జరిగాయి. శ్రీ పాంచరాత్ర ఆగమ సంప్రదాయం ప్రకారం ఆలయ ప్రధాన అర్చకులు పి. నరసింహాచార్యులు స్వామివారికి, అమ్మవార్లకు ప్రత్యేక పూజలు, కుంకుమార్చనలు ఘనంగా నిర్వహించారు.

ఉదయం 4 గంటల నుంచే భక్తులు ఆలయానికి చేరుకుని ముందుగా ధ్వజస్తంభానికి నమస్కరించి, ప్రదక్షిణలు చేసిన అనంతరం స్వామివారిని దర్శించుకున్నారు. మూడు బ్యాచ్‌లలో మొత్తం 126 మంది దంపతులు సత్యనారాయణ స్వామివారి వ్రతాలను ఆచరించారు. వ్రతాలు నిర్వహించిన దంపతులకు శేషవస్త్రం, స్వామివారి ఫొటో, నూక ప్రసాదం అందజేసి వేద ఆశీర్వచనాలు అందించారు. మధ్యాహ్నం సుమారు వెయ్యి మంది భక్తులకు అన్నసంతర్పణ నిర్వహించారు. సాయంత్రం భక్తుల కోసం సాంస్కృతిక కార్యక్రమాలను ఏర్పాటు చేశారు. భక్తులకు ఎలాంటి అసౌకర్యం కలగకుండా ట్రస్ట్ బోర్డు చైర్మన్ కొరుకొండ సూర్యప్రసాద్‌తో పాటు బొట్టా సరోజిని, జెర్రిపోతుల ప్రసన్న, నెల్లబల్లి వెంకటలక్ష్మి, ఉప్పులి అప్పులకొండ యాదవ్ తదితరులు ఏర్పాట్లను పర్యవేక్షించారు. ఈ కార్యక్రమాల వివరాలను ఆలయ ఈవో టి. రాజగోపాల్ రెడ్డి తెలిపారు.

రిపోర్టర్ : సత్యనారాయణ, ఒన్‌టౌన్, విశాఖపట్నం.