అర్నబ్' ముప్పుపై యంత్రాంగం అప్రమత్తం

గాజువాక, సూర్య : 'అర్నబ్' తుఫాను ముప్పు నేపథ్యంలో విపత్కర పరిస్థితులను సమర్థంగా ఎదుర్కొనేందుకు ప్రభుత్వ యంత్రాంగం సర్వసన్నద్ధంగా ఉండాలని వీఎంఆర్‌డీఏ ఎస్టేట్ అధికారి దయానిధి, జీవీఎంసీ జోనల్ కమిషనర్ శేషాద్రి, గాజువాక తహసీల్దార్ త్రినాథ్ ఆదేశించారు. ముందస్తు జాగ్రత్తల్లో భాగంగా సోమవారం తహసీల్దార్ కార్యాలయంలో రెవెన్యూ, పోలీసు, వైద్య, విద్యుత్, అగ్నిమాపక శాఖల అధికారులతో వారు సమన్వయ సమావేశం నిర్వహించారు. ఈ సందర్భంగా వారు మాట్లాడుతూ.. విపత్తు వేళ ప్రాణ, ఆస్తి నష్టాలు జరగకుండా అన్ని శాఖలు సమన్వయంతో పనిచేయాలని, లోతట్టు ప్రాంతాల ప్రజల భద్రతకు అత్యధిక ప్రాధాన్యం ఇస్తూ తక్షణ సహాయక చర్యలకు సిద్ధంగా ఉండాలని అధికారులకు దిశానిర్దేశం చేశారు. ​తుఫాను నేపథ్యంలో వాతావరణ శాఖ జారీ చేసే హెచ్చరికలను గమనిస్తూ ప్రజలు అప్రమత్తంగా ఉండాలని అధికారులు విజ్ఞప్తి చేశారు. గాలివాన సమయంలో అత్యవసరమైతే తప్ప ఇళ్ల నుంచి ఎవరూ బయటకు రావొద్దని, కూలే ప్రమాదం ఉన్న చెట్లు, విద్యుత్ స్తంభాలకు, తెగిపడిన కరెంటు తీగలకు దూరంగా ఉండాలని సూచించారు. లోతట్టు ప్రాంతాల వాసులు అధికారులు ఇచ్చే సూచనలు పాటిస్తూ ప్రభుత్వ యంత్రాంగానికి సహకరించాలని కోరారు. ఈ సమావేశంలో ఆర్ఐ  మృదుల గాజువాక, దువ్వాడ ఎస్‌ఐలు రామకృష్ణ, వెంకట్ లక్ష్మితో పాటు వివిధ శాఖల సిబ్బంది పాల్గొన్నారు.

రిపోర్టర్ : కోటి రెడ్డి, గాజువాక, విశాఖపట్నం.