పెట్టుబడుల పేరుతో మోసం - ఎల్‌ఐసీ ఏజెంట్ అరెస్ట్
సూర్య బోయినపల్లి, నవంబరు 5.. అధిక లాభాలు వస్తాయని పెట్టుబడుల పేరుతో పలువురిని నమ్మించి డబ్బులు వసూలు చేసి మోసానికి పాల్పడిన సిరిసిల్ల పట్టణానికి చెందిన ఎల్‌ఐసీ ఏజెంట్ రాపెల్లి ప్రవీణ్ కుమార్‌ను బోయినపల్లి పోలీసులు అరెస్ట్ చేశారు.
నిందితుడు కోదురుపాకమరియు నీలోజిపల్లి గ్రామాలకు చెందిన వ్యక్తుల నుంచి పెట్టుబడుల పేరుతో పెద్ద మొత్తంలో డబ్బులు తీసుకున్నాడు. తిరిగి చెల్లించాలని అడిగినప్పుడు బెదిరింపులకు పాల్పడినట్లు దర్యాప్తులో వెల్లడైంది.
నిందితుడిపై బోయినపల్లి పోలీస్ స్టేషన్‌లో రెండు కేసులు నమోదు కాగా, బోయినపల్లి ఎస్‌ఐ ఎన్. రమాకాంత్ నిందితుడిని అరెస్ట్ చేసి న్యాయస్థానంలో హాజరుపరిచారు. వేములవాడ టౌన్ పోలీస్ స్టేషన్‌లో కూడా నిందితుడిపై రెండు కేసులు నమోదైనట్లు గుర్తించారు.
ఇదే విధంగా నిందితుడి చేత మోసపోయిన ఇతర బాధితులు ఎవరైనా ఉంటే సంబంధిత పోలీస్ స్టేషన్‌లో ఫిర్యాదు చేయాలని వేములవాడ రూరల్ సర్కిల్ ఇన్‌స్పెక్టర్ ఎం. శ్రీనివాస్ తెలిపారు.
