పనుల్లో వేగం పెంచాలి.... ప్రజా ఫిర్యాదుల పరిష్కారంలో జాప్యం వద్దు అధికారులకు సీఎంసీ కమిషనర్ జి.సృజన ఆదేశం

మాదాపూర్,మేజర్ న్యూస్ :  నగరంలో పౌర మౌలిక సదుపాయాల అభివృద్ధి పనులను వేగవంతం చేయాలని, ప్రజా సమస్యల పరిష్కారంలో నిర్లక్ష్యం వహించవద్దని సైబరాబాద్ మున్సిపల్ కార్పొరేషన్ (సీఎంసీ) కమిషనర్ అధికారులను ఆదేశించారు. ఇంజనీరింగ్, ఎలక్ట్రికల్, అర్బన్ బయోడైవర్సిటీ (యూబీడీ) విభాగాల పనితీరుపై బుధవారం నిర్వహించిన సమీక్షా సమావేశంలో ఆయన పలు కీలక సూచనలు చేశారు. జోనల్ కమిషనర్లు, డిప్యూటీ కమిషనర్, విభాగాధిపతులు, సంబంధిత అధికారులు పాల్గొన్నారు.ఈ సందర్భంగా ఆయా విభాగాల పరిధిలో కొనసాగుతున్న అభివృద్ధి పనులు, పెండింగ్‌లో ఉన్న ప్రజా ఫిర్యాదులు, ప్రాధాన్య ప్రాజెక్టుల పురోగతిని కమిషనర్ సమీక్షించారు. ప్రజల నుంచి అందిన ఫిర్యాదులను నిర్దేశిత గడువులోగా పరిష్కరించాలని, పెండింగ్ పనులను యుద్ధ ప్రాతిపదికన పూర్తి చేయాలని ఆదేశించారు. పనుల నాణ్యత విషయంలో ఎక్కడా రాజీ పడకూడదని స్పష్టం చేశారు.నగరంలోని ప్రధాన రహదారి కూడళ్ల అభివృద్ధి, ఫుట్‌పాత్‌ల నిర్మాణం, పార్కుల అభివృద్ధి, ఆధునికీకరణపై ప్రత్యేక శ్రద్ధ పెట్టాలని కమిషనర్ సూచించారు. వర్షాలు కురిసినప్పుడు తరచూ నీరు నిలిచే ప్రాంతాలను గుర్తించి, తాత్కాలిక చర్యలతో సరిపెట్టకుండా శాశ్వత పరిష్కారాలు చేపట్టాలని ఆదేశించారు.వివిధ విభాగాల మధ్య సమన్వయం పెంచుకొని అభివృద్ధి పనులను ముందుకు తీసుకెళ్లాలని సూచించారు. ప్రతి పనిని క్షేత్రస్థాయిలో పర్యవేక్షిస్తూ నిర్దేశిత గడువులోగా పూర్తి చేయాలని స్పష్టం చేశారు. జోనల్ కమిషనర్లు, విభాగాధిపతులు, క్షేత్రస్థాయి అధికారులు పనుల అమలుపై వ్యక్తిగత బాధ్యత వహించాలని, పౌర మౌలిక సదుపాయాలు, సేవల్లో ప్రజలకు స్పష్టమైన మార్పు కనిపించేలా చర్యలు తీసుకోవాలని కమిషనర్ ఆదేశించారు.