ఉప్పల్ డిగ్రీ కళాశాలకు స్థలం కేటాయించాలి: ఎమ్మెల్యే బండారి
సూర్య సిటీ బ్యూరో, హైదరాబాద్: ఉప్పల్ నియోజకవర్గంలో ప్రభుత్వ డిగ్రీ కళాశాల శాశ్వత భవన నిర్మాణానికి అవసరమైన స్థలాన్ని తక్షణమే కేటాయించాలని కోరుతూ రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబుకు ఉప్పల్ ఎమ్మెల్యే బండారి లక్ష్మారెడ్డి వినతిపత్రం అందజేశారు. సచివాలయంలో మంత్రిని మర్యాదపూర్వకంగా కలిసిన ఎమ్మెల్యే, స్థానిక విద్యార్థుల ఉన్నత విద్యావసరాలు మరియు కళాశాల ఎదుర్కొంటున్న సమస్యలను ఆయన దృష్టికి తీసుకెళ్లారు.
ఉప్పల్ పరిసర ప్రాంతాల్లోని పేద, మధ్యతరగతి కుటుంబాలకు చెందిన విద్యార్థులకు నాణ్యమైన ఉన్నత విద్యను చేరువ చేయాలంటే స్థానికంగా సొంత భవనంతో కూడిన ప్రభుత్వ డిగ్రీ కళాశాల అత్యంత ఆవశ్యకమని ఎమ్మెల్యే పేర్కొన్నారు. ప్రస్తుతం ఈ డిగ్రీ కళాశాల గత ఆరేళ్లుగా శాశ్వత భవనం లేక స్థానిక ప్రభుత్వ పాఠశాల ప్రాంగణంలోనే అరకొర వసతుల మధ్య కొనసాగుతోందని వివరించారు.
వినతిపత్రంలోని ముఖ్యాంశాలు:
శాశ్వత ప్రాంగణం ఆవశ్యకత :పాఠశాల భవనంలో తరగతులు నిర్వహించడం వల్ల అటు పాఠశాల విద్యార్థులకు, ఇటు డిగ్రీ విద్యార్థులకు తీవ్ర అసౌకర్యం కలుగుతోందని, విద్యార్థుల సంఖ్యకు అనుగుణంగా ల్యాబ్‌లు, లైబ్రరీ, క్రీడా మైదానం వంటి మౌలిక వసతులు కల్పించలేకపోతున్నామని తెలిపారు.
విద్యార్థుల భవిష్యత్తుకు భరోసా :నియోజకవర్గ కేంద్రంలోనే పూర్తి స్థాయి మౌలిక సదుపాయాలతో కూడిన కళాశాల భవనం అందుబాటులోకి వస్తే వేలాది మంది విద్యార్థులకు ఉన్నత చదువుల కోసం సుదూర ప్రాంతాలకు వెళ్లే శ్రమ తప్పుతుందని పేర్కొన్నారు.
త్వరితగతిన స్థల కేటాయింపునకు విజ్ఞప్తి :విద్యార్థుల భవిష్యత్తును దృష్టిలో ఉంచుకుని ప్రభుత్వ డిగ్రీ కళాశాల నిర్మాణానికి అవసరమైన అనువైన ప్రభుత్వ స్థలాన్ని త్వరితగతిన గుర్తించి కేటాయించాలని, అలాగే భవన నిర్మాణానికి తగిన నిధులు మంజూరు చేయాలని మంత్రిని కోరారు.
ఈ విజ్ఞప్తిపై పరిశ్రమల శాఖ మంత్రి శ్రీధర్ బాబు సానుకూలంగా స్పందిస్తూ, సంబంధిత అధికారులతో మాట్లాడి స్థల పరిశీలన మరియు కేటాయింపు ప్రక్రియను వేగవంతం చేసేందుకు చర్యలు తీసుకుంటామని హామీ ఇచ్చారు.
