telangana
మూసీ రివర్ ఫ్రంట్‌తో నైట్ ఎకానమీ..
హైదరాబాద్: మూసీ రివర్ ఫ్రంట్ అభివృద్ధి పనులు త్వరలోనే ప్రారంభం కాబోతున్నాయని, ఈ ప్రాజెక్టు పరిసరాల్లో 'నైట్ ఎకానమీ'ని ప్రోత్సహించడం ద్వారా స్థానిక యువతకు ఉపాధి అవకాశాలు సృష్టిస్తామని తెలంగాణ ముఖ్యమంత్రి ఎ. రేవంత్ రెడ్డి వెల్లడించారు. భారతదేశ తొలి విద్యాశాఖ మంత్రి మౌలానా అబుల్ కలాం ఆజాద్ జయంతిని పురస్కరించుకుని మైనారిటీ సంక్షేమ శాఖ ఆధ్వర్యంలో బంజారా భవన్‌లో నిర్వహించిన జాతీయ విద్యా దినోత్సవం, మైనారిటీ సంక్షేమ దినోత్సవ కార్యక్రమంలో ఆయన ముఖ్య అతిథిగా పాల్గొని ప్రసంగించారు.
మూసీని ప్రపంచస్థాయి సుందరమైన రివర్ ఫ్రంట్‌గా తీర్చిదిద్దడంతో పాటు, నైట్ ఎకానమీ కార్యకలాపాల విస్తరణ ద్వారా రాష్ట్ర ఆర్థిక వ్యవస్థ బలపడి, దేశ పురోగతికి తోడ్పడుతుందని సీఎం వివరించారు. దేశ విదేశాల నుంచి పర్యాటకులను ఆకర్షించేలా దీనికి రూపురేఖలు దిద్దుతున్నామని తెలిపారు.
పాతనగరాన్ని 'ఓల్డ్ సిటీ' అనడం కంటే 'ఒరిజినల్ సిటీ'గా పిలవడమే సముచితమని, హైదరాబాద్ గత వైభవాన్ని పునరుద్ధరించే బాధ్యతను ప్రభుత్వం భుజస్కంధాలపై వేసుకుందని ఆయన స్పష్టం చేశారు. గౌలిగూడ నుంచి చాంద్రాయణగుట్ట వరకు మెట్రో రైలు విస్తరణ పనులు వచ్చే రెండు నెలల్లో ప్రారంభమవుతాయని, మీరాలం ట్యాంక్‌ను ఏడాది వ్యవధిలో పర్యాటక కేంద్రంగా తీర్చిదిద్దుతామని హామీ ఇచ్చారు.
దేశంలో ఐఐటీల స్థాపనకు, విద్యా వ్యవస్థ విస్తరణకు మౌలానా ఆజాద్ కీలక పునాదులు వేశారని సీఎం గుర్తుచేశారు. మారుతున్న పరిస్థితుల్లో విద్యతో పాటు నైపుణ్యాలకే (Skills) ప్రాధాన్యత ఉందన్న ఉద్దేశంతో ఐటీఐలను 'ఏటీసీ'లుగా మార్చామని, నర్సరీ నుంచి 12వ తరగతి వరకు విద్యకు, ఆపై ఆవిష్కరణలకు ప్రాధాన్యత ఇచ్చేలా సంస్కరణలు తీసుకొచ్చామని వెల్లడించారు. మైనారిటీ యువతలోని ప్రతిభను వెలికితీసేలా, బ్లూకాలర్ ఉద్యోగాల ప్రాముఖ్యతను గుర్తించి రాష్ట్రంలో 'యంగ్ ఇండియా స్కిల్స్ యూనివర్సిటీ' మరియు 'స్పోర్ట్స్ యూనివర్సిటీ'లను ఏర్పాటు చేశామని వివరించారు.
దేశ జనాభాలో 15 శాతం ఉన్న మైనారిటీలు పురోగతి సాధించినప్పుడే దేశాభివృద్ధి సాధ్యమని పేర్కొన్న సీఎం, నిరుపేదల కోసం హైదరాబాద్ నగరంలో లక్ష ఇందిరమ్మ ఇళ్లు నిర్మించబోతున్నామని ప్రకటించారు.
ఈ కార్యక్రమంలో మంత్రులు మహమ్మద్ అజారుద్దీన్, పొంగులేటి శ్రీనివాస్ రెడ్డి, ప్రభుత్వ సలహాదారులు మహమ్మద్ అలీ షబ్బీర్, వి. హనుమంతరావు, ఎంపీలు వేం నరేందర్ రెడ్డి, అనిల్ కుమార్ యాదవ్, టీజీఎమ్‌ఆర్‌ఈఐఎస్ వైస్ ఛైర్మన్ ఫహీం ఖురేషీతో పాటు పలువురు కార్పొరేషన్ ఛైర్మన్లు, ప్రజాప్రతినిధులు పాల్గొన్నారు.
