కేంద్రమంత్రి అమిత్ షా ఆధారాలు చూపాలిః కాంగ్రెస్ నేత ఖాలిద్ సైఫుల్లా
సూర్య, తెలంగాణ బ్యూరో ప్రతినిధిః ఓటర్ల జాబితాల ప్రత్యేక సమగ్ర సవరణ సందర్భంగా మూడు కోట్ల మంది బంగ్లాదేశ్ చొరబాటుదారులను గుర్తించారంటూ కేంద్ర హోంమంత్రి అమిత్ షా చేసిన ప్రకటనను హైదరాబాద్ జిల్లా కాంగ్రెస్ కమిటీ (డీసీసీ) అధ్యక్షుడు సయ్యద్ ఖాలిద్ సైఫుల్లా శనివారం తీవ్రంగా ప్రశ్నించారు. ఈ ఆరోపణకు సంబంధించిన ఆధారాలను బహిర్గతం చేయాలని, లేనిపక్షంలో తన వ్యాఖ్యలను బహిరంగంగా ఉపసంహరించుకోవాలని డిమాండ్ చేశారు. 2025 మే 30న సమాచార హక్కు చట్టం కింద ఇచ్చిన సమాధానంలో, దేశంలో అక్రమంగా నివసిస్తున్న విదేశీయులకు సంబంధించిన సమాచారం కేంద్ర స్థాయిలో అందుబాటులో లేదని కేంద్ర హోంమంత్రిత్వ శాఖ పేర్కొన్నట్లు సైఫుల్లా గుర్తుచేశారు. అదేవిధంగా, 2026 జనవరి 23న ఇచ్చిన మరో ఆర్టీఐ సమాధానంలో కూడా చొరబాటుదారుల గుర్తింపు, అరెస్టులు, దేశ బహిష్కరణకు సంబంధించిన సమగ్ర గణాంకాలు కేంద్ర స్థాయిలో అందుబాటులో లేవని హోంమంత్రిత్వ శాఖ తెలిపిందని పేర్కొన్నారు. అమిత్ షా నేతృత్వంలోని హోంమంత్రిత్వ శాఖ వద్దే ఈ సమాచారం లేదని చెబుతుంటే, హోంమంత్రికి అకస్మాత్తుగా మూడు కోట్ల మంది అనే కచ్చితమైన సంఖ్య ఎక్కడి నుంచి వచ్చింది? దేశవ్యాప్తంగా ఏదైనా ప్రత్యేక విచారణ నిర్వహించారా? ఈ వ్యక్తులను ఏ ప్రభుత్వ సంస్థ గుర్తించింది? అందుకు ఆధారాలు ఎక్కడ? అని సైఫుల్లా ప్రశ్నించారు.
ఎ.రవీందర్‌, హైదరాబాద్.
