కజకిస్థాన్‌లో విక్టరీ వెంకటేశ్, కళ్యాణ్ రామ్ 'జనవరి 12 విడుదల' షూటింగ్: అనిల్ రావిపూడి హైఓల్టేజ్ ప్లాన్
సూర్య ఎంటర్‌టైన్‌మెంట్ డెస్క్: టాలీవుడ్ సక్సెస్‌ఫుల్ డైరెక్టర్ అనిల్ రావిపూడి దర్శకత్వంలో విక్టరీ వెంకటేశ్ మరియు నందమూరి కళ్యాణ్ రామ్ హీరోలుగా తెరకెక్కుతున్న అత్యంత ప్రతిష్టాత్మక మల్టీస్టారర్ చిత్రం 'జనవరి 12 విడుదల' (January 12 Vidudala) షూటింగ్ శరవేగంగా జరుగుతోంది. బావ బామ్మర్ది సౌజన్యంతో అనే ఆసక్తికరమైన ట్యాగ్‌లైన్‌తో రూపొందుతున్న ఈ చిత్రంపై టాలీవుడ్‌లో ఇప్పటికే భారీ అంచనాలు నెలకొన్నాయి. సంక్రాంతి కానుకగా జనవరి 12న ప్రపంచవ్యాప్తంగా గ్రాండ్‌గా థియేటర్లలోకి రానున్న ఈ ప్రాజెక్ట్‌కు సంబంధించి తాజాగా ఒక క్రేజీ అప్‌డేట్ వెలువడింది.
సినిమాలోని కీలక సన్నివేశాలు మరియు పాటల చిత్రీకరణ కోసం చిత్ర యూనిట్ తాజాగా విదేశాలకు పయణమైంది. ప్రసుత్తం అందమైన లొకేషన్లకు నిలయమైన కజకిస్థాన్‌లో సరికొత్త షెడ్యూల్‌ను ప్రారంభించినట్లు మేకర్స్ అధికారికంగా వెల్లడించారు. ఈ విదేశీ షెడ్యూల్‌లో భాగంగా చిత్రంలో అత్యంత కీలకమైన భారీ యాక్షన్ సీక్వెన్స్‌తో పాటు ఒక ప్రత్యేక పాటను తెరకెక్కిస్తున్నారు. ప్రముఖ స్టంట్ కొరియోగ్రాఫర్ రియల్ సతీష్ పర్యవేక్షణలో వెంకటేశ్, కళ్యాణ్ రామ్‌లపై అత్యంత భారీ వ్యయంతో ఈ హైఓల్టేజ్ ఫైట్ సీన్స్‌ను ప్లాన్ చేశారు.
ఈ షెడ్యూల్‌లోనే శేఖర్ మాస్టర్ కొరియోగ్రాఫర్‌గా వ్యవహరిస్తున్న ఒక అద్భుతమైన పాటను కూడా చిత్రీకరిస్తున్నట్లు సమాచారం. మైసూర్ మరియు ఊటీలలో మునుపటి షెడ్యూళ్లను విజయవంతంగా పూర్తి చేసుకున్న ఈ బృందం, ఇప్పుడు కజకిస్థాన్‌లోని మంచు కొండలు మరియు సుందరమైన ప్రదేశాలలో ఈ తాజా షెడ్యూల్‌ను జరుపుకుంటోంది. ఈ చిత్రంలో వెంకటేశ్ సరసన కీర్తి సురేష్ నటిస్తుండగా, కళ్యాణ్ రామ్ జోడీగా కృతి శెట్టి కీలక పాత్రలో కనిపించనున్నారు.
షేన్ స్క్రీన్స్ బ్యానర్‌పై నిర్మాత సాహు గారపాటి అత్యంత ప్రతిష్టాత్మకంగా నిర్మిస్తున్న ఈ చిత్రానికి జీవీ ప్రకాశ్ కుమార్ సంగీతం అందిస్తున్నారు. అనిల్ రావిపూడి మార్కు కామెడీ, కుటుంబ బంధాలు మరియు ఊహించని యాక్షన్ ఎపిసోడ్స్ కలబోతగా ఈ సినిమా ఉండబోతుందని చిత్ర యూనిట్ ధీమా వ్యక్తం చేస్తోంది. సంక్రాంతి సీజన్ సెంటిమెంట్‌ను నమ్ముతూ బరిలోకి దిగుతున్న ఈ క్రేజీ ప్రాజెక్ట్ బాక్సాఫీస్ వద్ద ఎలాంటి సంచలనాలు సృష్టిస్తుందోనని అభిమానులు ఎంతో ఆసక్తిగా ఎదురుచూస్తున్నారు.
