కల్వకోల్ సల్లగరిగే చెరువుకు కేఎల్ఐ నీరు చేరేలా చర్యలు

పెద్దకొత్తపల్లి. సూర్య న్యూస్: మండల పరిధిలోని కల్వకోల్ గ్రామంలోని సల్లగరిగే చెరువుకు కేఎల్ఐ కాలువ ద్వారా నీరు చేరకపోవడంతో స్పందించిన గ్రామ సర్పంచ్ బంట్రోత్ శ్రీనివాసులు ప్రత్యేక చొరవ తీసుకున్నారు. ఆయన ఆధ్వర్యంలో చేన్నపురావుపల్లి నుంచి కల్వకోల్ వరకు కాలువ వెంట పర్యవేక్షిస్తూ నీటి ప్రవాహానికి అడ్డుగా ఉన్న చెత్తాచెదారం, రాళ్లను తొలగించారు. కాలువలో నీరు సజావుగా ప్రవహించి సల్లగరిగే చెరువుకు చేరేలా శ్రమించారు. చెరువులోకి కేఎల్ఐ నీరు చేరితే రైతులకు సాగునీటి ఇబ్బందులు తగ్గడంతో పాటు పశువులకు నీటి సౌకర్యం కలుగుతుందని గ్రామస్తులు ఆశాభావం వ్యక్తం చేస్తున్నారు. గ్రామ ప్రయోజనాల కోసం సర్పంచ్ స్వయంగా ముందుకు వచ్చి పనులు చేపట్టడంపై స్థానికులు హర్షం వ్యక్తం చేశారు. ఈ కార్యక్రమంలో నల్లవెల్లి రాములు, అమ్మపల్లి బిచ్చన్న, మొట్ట వెంకటస్వామి, నూనె వెంకటేష్ కుమార్ తదితరులు పాల్గొన్నారు.