విధేయతకు పట్టం..... గురాన రాధికకు "డిప్యూటీ" పీఠం ?

విజయనగరం బ్యూరో, సూర్య :  స్థానిక పోరులో ప్రధాన ఘట్టం ముగిసింది. నగరపాలక సంస్థ మేయర్ గా అవనాపు భార్గవి గెలుపొందిన విషయం తెలిసింది. ఇక మరో ప్రాధాన్యత పదవి డిప్యూటీ మేయర్ కాగా ఆ పదవి ఎన్నికకు కూడా ఈ నెల 23న నోటిఫికేషన్ వెలువడింది. దీంతో ఈ పదవిపై ఆశావహుల్లో గుబులు రేగుతోంది. గెలుపొందిన ప్రధాన కూటమి కార్పొరేటర్లు డిప్యూటీ మేయర్ పదవిపై ఎవరి స్థాయిలో వారు పావులు కదుపుతున్నారు. అయితే ఈ పదవి ఎవరికి ఇవ్వాలన్నా అందుకు స్థానిక శాసన సభ్యురాలు అదితి గజపతిరాజు ఆశీస్సులు పుష్కలంగా ఉండాలన్న విషయం తెలిసిందే. ఇదిలా ఉంటే డిప్యూటీ మేయర్ గా గురాన రాధికకు అవకాశాలు మెండుగా ఉన్నాయని టౌన్ పబ్లిక్ టాక్. అయితే గురాన రాధికకు ఆ పదవి వరించడం సమంజసమైనదే నని  సర్వత్రా అభిప్రాయాలు వ్యక్తమవుతున్నాయి. నిజానికి ఆమె జనసేన అభ్యర్థిగా తన సమీప అభ్యర్థి పై 500 ఓట్ల మెజార్టీతో గెలుపొందారు. ఆమె భర్త గురాన అయ్యలు ఎన్నో ఏళ్లుగా నగర రాజకీయాలలో చురుకైన పాత్రను పోషిస్తున్నారు. ఆయన తండ్రి దివంగత గురాన సాధూరావు ప్రముఖ వ్యాపారవేత్తగా, రాజకీయ నాయకులుగా, నగరానికి సేవలు అందించారు. అక్క మీసాల గీత శాసనసభ్యులుగా, మున్సిపల్ చైర్ పర్సన్ గా సుపరిచితులు. సుదీర్ఘ రాజకీయ నేపథ్యమున్న గురాన కుటుంబానికి కోడలుగా వచ్చిన రాధిక డిప్యూటీ మేయర్ గా ప్రకటిస్తే మంచిదే నన్న భావన సర్వత్రా వ్యక్తం అవుతుంది. పొత్తుధర్మంలో జనసేనకు ప్రాధాన్యత ఇచ్చినట్లుగా కూడా ఉంటుందంటున్నారు రాజకీయ పరిశీలకులు. అందునా మంచి కుటుంబం, విధేయత, ఆర్థికంగా, సామాజికంగా అన్ని అంశాలు గురాన రాధిక కు కలిసి వచ్చే అవకాశాలు. గురాన అయ్యలు కూడా నగరంలో సౌమ్యుడన్న  ప్రత్యేక గుర్తింపు ఉంది. రాధిక కూడా అభిమానస్తురాలిగా, దైవభక్తి పారాయణరాలుగా, ముఖ్యంగా విద్యాధికురాలిగా పేరుంది. కావున అన్ని అంశాలను పరిగణలోకి తీసుకొని గురాన రాధికకు డిప్యూటీ మేయర్ గా ప్రకటిస్తే మంచిదని తద్వారా నగర అభివృద్ధిలో కీలక భూమిక కాగలరన్న అభిప్రాయం నగరమంతా నెలకొంది.