telangana
కార్మిక సంక్షేమ బోర్డు నిధుల మళ్లింపును సహించం..
ముషీరాబాద్ మేజర్ న్యూస్ :కార్మిక సంక్షేమ బోర్డు నిధుల మళ్లింపును వెంటనే నిలిపివేయాలని, లేనిపక్షంలో ముఖ్యమంత్రి నివాసాన్ని ముట్టడిస్తామని కార్మిక సంఘాల నాయకులు హెచ్చరించారు. కార్మికుల హక్కులు, సంక్షేమ నిధుల పరిరక్షణకు సంఘాలన్నీ ఐక్యంగా పోరాడాలని మాజీ ఐపీఎస్ అధికారి ఆర్ఎస్ ప్రవీణ్కుమార్ పిలుపునిచ్చారు. సోమవారం హైదరాబాద్ బాగ్లింగంపల్లి లోని సుందరయ్య విజ్ఞాన కేంద్రంలో బీఆర్టీయూ అనుబంధ భవన, ఇతర నిర్మాణ కార్మిక సంఘం అధ్యక్షుడు నారాయణ ఆధ్వర్యంలో జరిగిన రౌండ్టేబుల్ సమావేశంలో ఆయన ముఖ్య అతిథిగా పాల్గొన్నారు. ఈ సందర్భంగా ప్రవీణ్కుమార్ మాట్లాడుతూ బీమా కార్యకలాపాలను ట్రయల్ బ్లేజర్ సంస్థకు అప్పగించి రూ.150 కోట్ల అవినీతికి పాల్పడ్డారని, కార్మికులకు సంబంధం లేని ఆధునిక శిక్షణ కేంద్రాల కోసం రూ.600 కోట్లు కేటాయించారని ఆరోపించారు. ఇందిరమ్మ కుటుంబ బీమా పథకంలో బోర్డు బీమా కార్యకలాపాలను విలీనం చేస్తే పెద్ద ఎత్తున ఉద్యమిస్తామని హెచ్చరించారు. నారాయణ మాట్లాడుతూ కార్మిక సంక్షేమ బోర్డును నిర్వీర్యం చేయకుండా బలోపేతం చేయాలని, హెల్త్ స్క్రీనింగ్ పరీక్షల పేరుతో నిధుల దుర్వినియోగాన్ని అరికట్టాలని, పెండింగ్ క్లెయిమ్లను వెంటనే పరిష్కరించాలని కోరారు. బీఆర్టీయూ రాష్ట్ర అధ్యక్షుడు రాంబాబు యాదవ్ మాట్లాడుతూ 1996లో కార్మికుల సంక్షేమం కోసం మహోన్నత లక్ష్యాలతో ఏర్పాటైన బోర్డు నిధులపై రాజకీయ నాయకులు కన్నేయడం దురదృష్ట కరమన్నారు. కార్మికుల సొమ్మును కాపాడుకునేందుకు సంఘాలన్నీ ఐక్య ఉద్యమాలకు సిద్ధం కావాలని పిలుపునిచ్చారు. రాష్ట్ర ప్రధాన కార్యదర్శి వేముల మారయ్య మాట్లాడుతూ కార్మిక సంక్షేమ బోర్డు నిధులు కార్మికుల ప్రయోజనాలకే వినియోగించాలని, వాటిని ఇతర పథకాలకు మళ్లించే చర్యలను అడ్డుకోవాలని పేర్కొన్నారు. సమావేశంలో ప్రభాకర్, పాలదుగుల రమేష్, టీయూసీఐ అధ్యక్షుడు సూర్యం, ఐఎఫ్టీయూ అధ్యక్షురాలు అనురాధ, ఏఐటీయూసీ నాయకుడు యాదగిరి, కమర్ల ఐలయ్య, కుమార్, రాజు, కొండల రెడ్డి, పల్లపు సత్యనారాయణ, గంధం అంజయ్య తదితరులు పాల్గొన్నారు.