గ్రామకంఠం భూములు కాపాడాలని ఫిర్యాదు

నవాబుపేట సూర్య న్యూస్: మండలంలోని ధర్పల్లి గ్రామంలో గ్రామకంఠం భూముల ఆక్రమణపై విచారణ జరిపి,హక్కులు నిర్ధారణ అయ్యే వరకు వివాదాస్పద స్థలాల్లో ఇళ్ల నిర్మాణ అనుమతులు మంజూరు చేయవద్దని కోరుతూ గ్రామస్తులు సోమవారం ఎంపీడీవో జయరాం నాయక్‌కు ప్రజావాణిలో ఫిర్యాదు చేశారు.ఈ సందర్భంగా గ్రామస్తులు మాట్లాడుతూ..గ్రామంలో సుమారు 500చదరపు గజాలకు పైగా ఉన్న స్థలంతో పాటు,మరో 3,000చదరపు గజాల వరకు గ్రామకంఠం భూములు ఆక్రమణకు గురైనట్లు ఫిర్యాదులో పేర్కొన్నారు.సంబంధిత భూముల యాజమాన్య హక్కులు,హద్దులపై గ్రామపంచాయతీ,రెవెన్యూ రికార్డుల ఆధారంగా విచారణ జరిపించాలని కోరారు.విచారణ పూర్తయ్యే వరకు ఇళ్ల నిర్మాణ అనుమతులు నిలిపివేయాలని,ప్రభుత్వ లేదా గ్రామపంచాయతీ భూములుగా తేలితే చట్టప్రకారం చర్యలు తీసుకొని,అర్హులైన నిరుపేదలకు కేటాయించే అంశాన్ని పరిశీలించాలని విజ్ఞప్తి చేశారు.