ఎన్ఎస్ఎస్ ఆధ్వర్యంలో ప్రపంచ మధుమేహ దినోత్సవ ర్యాలీ

సూర్య భైంసా : భైంసా పట్టణంలోని గురుకృపా ఒకేషనల్ జూనియర్ కళాశాల ఎన్ఎస్ఎస్ ఆధ్వర్యంలో ప్రపంచ మధుమేహ దినోత్సవ ర్యాలీ కార్యక్రమాన్ని ఘనంగా నిర్వహించడం జరిగింది ఈ కార్యక్రమంలో భాగంగా కళాశాల విద్యార్థులు మధుమేహ వ్యాధి పట్ల అవగాహన కలిగి ఉండాలని ప్రజలకు సూచిస్తూ భారీ ర్యాలీ నిర్వహించారు.ఈ కార్యక్రమంలో భాగంగా భైంసా ఏరియా హాస్పిటల్ సూపర్డెంట్ డాక్టర్ యు.కాశీనాథ్ మాట్లాడుతూ సమాజంలో మధుమేహ వ్యాధిపై అవగాహన లేక చాలామంది ప్రజలు అనారోగ్యం బారిన పడుతున్నారని అలాంటివారు తగు జాగ్రత్తలు తీసుకొని ఆరోగ్యాన్ని పరిరక్షించుకోవాలని సూచించారు.అంతేకాకుండా మధుమేహానికి సంబంధించిన మందులు ప్రభుత్వ ఆసుపత్రిలో అందుబాటులో ఉన్నాయని తెలిపారు.ప్రతి ఏటా ప్రజలకు మధుమేహం వ్యాధి పట్ల అవగాహన కల్పిస్తున్న గురుకృపా కళాశాలను అభినందించారు. అనంతరం భైంసా ఏరియా ఆసుపత్రి ప్రముఖ మానసిక వైద్యులు డాక్టర్ సురేష్ అల్లాడి మాట్లాడుతూ చాలా మంది మానసిక ఒత్తిడి కారణంగా కూడా డయాబెటిస్ వ్యాధికి గురవుతున్నారని తెలిపారు. సరైన పోషకాహారం,ప్రతినిత్యం వ్యాయామం చేయడం వల్ల మధుమేహ వ్యాధి రాకుండా జాగ్రత్త పడవచ్చని తెలిపారు. అనంతరం జెండా ఊపి ర్యాలీని ప్రారంభించారు. ర్యాలీలో భైంసా సిఐ సాయికుమార్ పాల్గొని మధుమేహ వ్యాధిపై అవగాహన కల్పిస్తున్న విద్యార్థులను ప్రత్యేకంగా అభినందించారు.ఈ కార్యక్రమంలో గురుకృపా ఒకేషనల్ జూనియర్ కళాశాల ప్రిన్సిపాల్ సాయినాథ్,అధ్యాపకులు సూర్యకాంత్,ప్రవళిక,కళాశాల ఎన్ఎస్ఎస్ వాలంటీర్లు,వైద్య సిబ్బంది ఉన్నారు.