సూర్య, మందమర్రి : పట్టణంలోని కార్మెల్ ఉన్నత పాఠశాలలో బాలల దినోత్సవ వేడుకలు సందడిగా సాగాయి. శనివారం నిర్వహించిన ఈ వేడుకల్లో చిన్నారులు తమలోని సృజనాత్మకతకు పదునుపెట్టి వివిధ కళారూపాలతో ప్రేక్షకులను మంత్రముగ్ధులను చేశారు. ఫ్యాన్సీ డ్రెస్‌లతో విభిన్న పాత్రల్లో దర్శనమిస్తూ, సంప్రదాయ నృత్యాలు, సాంస్కృతిక ప్రదర్శనలతో పాఠశాల ప్రాంగణాన్ని సందడిగా మార్చారు. భారత తొలి ప్రధాని పండిట్ జవహర్‌లాల్ నెహ్రూ జన్మదినాన్ని పురస్కరించుకొని నిర్వహించిన ఈ కార్యక్రమం విద్యార్థుల్లో ఉత్సాహాన్ని నింపింది. ఈ సందర్భంగా కార్మెల్ అకాడమీ డైరెక్టర్ ఫాదర్ జేవీఆర్ రెక్స్ ఎస్.జే. మాట్లాడుతూ.. విద్యార్థుల్లో పుస్తక జ్ఞానంతోపాటు కళాత్మక నైపుణ్యాలను పెంపొందించడం కూడా విద్యలో భాగమేనని పేర్కొన్నారు. భారతీయ సంస్కృతి, సంప్రదాయాలను ప్రతిబింబించేలా చిన్నారులు ప్రదర్శించిన కళారూపాలు అభినందనీయమ న్నారు. ప్రతి విద్యార్థిలోనూ ఏదో ఒక ప్రత్యేక ప్రతిభ దాగి ఉంటుందని, అలాంటి ప్రతిభను గుర్తించి ప్రోత్సహిం చాల్సిన బాధ్యత ఉపాధ్యాయులు, తల్లిదండ్రులపై ఉందని తెలిపారు. వేడుకల్లో భాగంగా వ్యాసరచన, చిత్రలేఖనం, ఉపన్యాస పోటీలను నిర్వహించి విద్యార్థుల ఆలోచనా శక్తి, సృజనాత్మకతకు అవకాశం కల్పించారు. చిన్నారుల ప్రదర్శనలను చూసిన ఉపాధ్యాయులు, తల్లిదండ్రులు ఆనందం వ్యక్తం చేస్తూ వారిని అభినందించారు. ఈ కార్యక్రమంలో ఫాదర్లు రెక్స్, సాఫీను, జిజో, షిబుతో పాటు పాఠశాల ఉపాధ్యాయులు, ఉపాధ్యాయినులు పాల్గొన్నారు.
