ప్రతి కుటుంబానికి రూ.5 లక్షల బీమా భరోసా!

నవంబర్ 19 నుంచి ఇందిరమ్మ కుటుంబ జీవిత బీమా పథకం ప్రారంభం.. అర్హుల గుర్తింపు, నమోదు ప్రక్రియకు ఎదులాపురంలో సన్నాహాలు

*కులం, మతం, ఆదాయంతో సంబంధం లేకుండా అర్హులైన కుటుంబాలకు జీవిత బీమా రక్షణ కల్పించడమే లక్ష్యంగా రాష్ట్ర ప్రభుత్వం ప్రతిష్ఠాత్మకంగా చేపడుతున్న ఇందిరమ్మ కుటుంబ జీవిత బీమా పథకంపై ఎదులాపురం మున్సిపాలిటీలో అవగాహన సమావేశం నిర్వహించారు.

ఖమ్మం రూరల్ సూర్య మేజర్ న్యూస్ : పేద, మధ్యతరగతి కుటుంబాలకు ఆర్థిక భరోసా కల్పించే దిశగా రాష్ట్ర ప్రభుత్వం తీసుకొస్తున్న ఇందిరమ్మ కుటుంబ జీవిత బీమా పథకం అమలుకు ఎదులాపురం మున్సిపాలిటీ సన్నద్ధమవుతోంది. ఈ నెల 19న రాష్ట్ర ప్రభుత్వం అధికారికంగా ప్రారంభించనున్న ఈ పథకంపై శనివారం మున్సిపల్ కార్యాలయంలో చైర్‌పర్సన్ పోకబత్తిని అనిత అధ్యక్షతన అవగాహన, సన్నాహక సమావేశం నిర్వహించారు.

ఈ సందర్భంగా చైర్‌పర్సన్ అనిత మాట్లాడుతూ.. కులం, మతం, ఆదాయ పరిమితులతో సంబంధం లేకుండా అర్హులైన కుటుంబాలకు రూ.5 లక్షల జీవిత బీమా రక్షణ కల్పించడం ఈ పథకం ప్రధాన ఉద్దేశమని తెలిపారు. 18 నుంచి 59 ఏళ్ల వయస్సు కలిగిన అర్హులైన తెలంగాణ పౌరులు ఈ పథకం పరిధిలోకి వస్తారని వివరించారు. కుటుంబంలోని ఒక ప్రధాన సంపాదన సభ్యుడిని బీమా కోసం ఎంపిక చేసుకోవచ్చని, బీమా పొందిన వ్యక్తి మరణిస్తే నామినీకి రూ.5 లక్షల పరిహారం అందుతుందని పేర్కొన్నారు.
పథకం ప్రారంభానికి ముందే మున్సిపాలిటీలోని అన్ని వార్డుల్లో అర్హులైన కుటుంబాలను గుర్తించి, వివరాల సేకరణ, నమోదు ప్రక్రియకు అవసరమైన ఏర్పాట్లు పూర్తి చేయాలని అధికారులను ఆదేశించారు. ప్రభుత్వ మార్గదర్శకాల ప్రకారం ఒక్క అర్హ కుటుంబం కూడా పథక ప్రయోజనానికి దూరం కాకుండా అధికారులు, సిబ్బంది సమన్వయంతో పనిచేయాలని సూచించారు.
ఈ సమావేశంలో మున్సిపల్ కమిషనర్ ఆళ్ల శ్రీనివాసరెడ్డి, కౌన్సిలర్లు, మున్సిపల్ అధికారులు, సిబ్బంది పాల్గొన్నారు.