బ్యాడ్మింటన్, టేబుల్ టెన్నిస్‌లో బాలబాలికలకు ప్రత్యేక శిక్షణ : సురేష్

సూర్య - పెద్దపల్లి: పెద్దపల్లి వ్యవసాయ మార్కెట్ ఆవరణలో నూతనంగా నిర్మించిన ఇండోర్ బ్యాడ్మింటన్ కోర్టును త్వరలో ప్రారంభించనున్నట్లు జిల్లా యువజన, క్రీడల శాఖ అధికారి ఎ. సురేష్ తెలిపారు.
గురువారం ఆయన మాట్లాడుతూ.. క్రీడాకారులకు మెరుగైన సదుపాయాలు కల్పించేందుకు కోర్టును ఏర్పాటు చేసినట్లు వెల్లడించారు. బ్యాడ్మింటన్, టేబుల్ టెన్నిస్‌లో బాలబాలికలకు కోచ్ ద్వారా ప్రత్యేక శిక్షణ అందించనున్నట్లు తెలిపారు. కోర్టు వినియోగానికి రూ.1,000 రిజిస్ట్రేషన్, నెలకు రూ.1,000 రుసుము చెల్లించాల్సి ఉంటుందని పేర్కొన్నారు. శిక్షణకు నెలకు రూ.800, గంటపాటు బ్యాడ్మింటన్ ఆడేందుకు రూ.300 రుసుము నిర్ణయించినట్లు తెలిపారు.
కోర్టు ఉదయం 5.30 నుంచి 9.30 వరకు, సాయంత్రం 5 నుంచి 9.30 గంటల వరకు అందుబాటులో ఉంటుందని, క్రీడాకారులు తప్పనిసరిగా బ్యాడ్మింటన్ షూస్ ధరించాలని సూచించారు. ఆసక్తి గలవారు జిల్లా యువజన, క్రీడల శాఖ కార్యాలయంలోని గది నంబర్ 232లో నమోదు చేసుకోవాలని, వివరాలకు 9963960063 నంబర్‌ను సంప్రదించాలని కోరారు.