-అధికారి హోదాలోనే కాదు... సామాజిక బాధ్యతలోనూ ముందడుగు! --ఎంవీఐ వెంకటస్వామి ప్రోత్సాహం… ---43 మంది విద్యార్థులకు షేక్ లతీఫ్ ఆర్థిక భరోసా

*అధికారి హోదాలోనే కాదు... సామాజిక బాధ్యతలోనూ ముందడుగు!*

*ఎంవీఐ వెంకటస్వామి ప్రోత్సాహం...*                

*43 మంది విద్యార్థులకు షేక్ లతీఫ్ ఆర్థిక భరోసా*

వైరా రూరల్ (సూర్య న్యూస్):-

ప్రభుత్వ అధికారి అంటే కేవలం విధులకే పరిమితం కాకుండా సమాజం పట్ల బాధ్యతను గుర్తించి భావితరాల భవిష్యత్తుకు అండగా నిలవాలనే సందేశాన్ని వైరా మోటార్ వెహికల్ ఇన్‌స్పెక్టర్ (ఎంవీఐ) వెంకటస్వామి చాటిచెప్పారు. ప్రభుత్వ పాఠశాలల్లో చదువుతున్న విద్యార్థులను ప్రోత్సహించే కార్యక్రమంలో ముఖ్యఅతిథిగా పాల్గొని తన వంతు ప్రోత్సాహాన్ని అందించారు.
వైరా మండలంలోని సిరిపురం, గరికపాడు జిల్లా పరిషత్ ఉన్నత పాఠశాలల్లో పదో తరగతి చదువుతున్న మొత్తం 43 మంది విద్యార్థులకు సామాజిక కార్యకర్త షేక్ లతీఫ్ పరీక్ష ఫీజులను స్వయంగా చెల్లించి ఆర్థిక భరోసా కల్పించారు. సిరిపురం పాఠశాలలో 27 మంది, గరికపాడు పాఠశాలలో 16 మంది విద్యార్థులకు ఈ సహాయం అందించారు.
సిరిపురం జిల్లా పరిషత్ ఉన్నత పాఠశాలలో నిర్వహించిన కార్యక్రమానికి ముఖ్యఅతిథిగా హాజరైన ఎంవీఐ వెంకటస్వామి విద్యార్థులను ఉద్దేశించి ప్రోత్సహించారు. పేదరికం చదువుకు అడ్డంకి కాకూడదని, విద్యార్థులు కష్టపడి చదివి ఉన్నత లక్ష్యాలను సాధించాలని ఆకాంక్షించారు. ప్రభుత్వ పాఠశాలల్లో చదువుతున్న విద్యార్థుల ప్రతిభను గుర్తించి ప్రోత్సహించడం సమాజంలోని ప్రతి ఒక్కరి బాధ్యత అని ఈ కార్యక్రమం ద్వారా చాటిచెప్పారు.
అదేవిధంగా గరికపాడు జిల్లా పరిషత్ ఉన్నత పాఠశాలలో నిర్వహించిన కార్యక్రమానికి గ్రామ సర్పంచ్ నాగలక్ష్మి ముఖ్యఅతిథిగా హాజరయ్యారు. విద్యార్థులకు పరీక్ష ఫీజులు చెల్లించిన షేక్ లతీఫ్ సేవలను అభినందించారు.
ఈ కార్యక్రమాల్లో సిరిపురం ప్రధానోపాధ్యాయురాలు సూర్యకుమారి, పాఠశాల చైర్మన్ షేక్ బి. జాన్‌బీ, గరికపాడు ప్రధానోపాధ్యాయుడు రమేష్, పాఠశాల చైర్మన్ గంగిదేవుల తిరుపతమ్మతో పాటు ఇరు పాఠశాలల ఉపాధ్యాయినీ, ఉపాధ్యాయులు పాల్గొన్నారు.
అధికార హోదా సమాజంలో గౌరవాన్ని తెస్తే.. సామాజిక బాధ్యత ఆ గౌరవానికి మరింత విలువను తెస్తుంది. ఎంవీఐ వెంకటస్వామి విద్యార్థులను ప్రోత్సహించడం, షేక్ లతీఫ్ 43 మంది విద్యార్థుల పరీక్ష ఫీజులు భరించడం అభినందనీయమని పలువురు పేర్కొన్నారు. ఇలాంటి సేవా కార్యక్రమాలు మరింత మందికి స్ఫూర్తిగా నిలవాలని ఆకాంక్షించారు.