కుటుంబ సమేతంగా ఓటు వేసిన వైసీపీ నేత వరికూటి అశోక్ బాబు

వేమూరు (భట్టిప్రోలు), మేజర్ న్యూస్: వేమూరు నియోజకవర్గంలో గురువారం జరిగిన ఎంపీటీసీ, జడ్పీటీసీ ఎన్నికల్లో వైఎస్ఆర్ కాంగ్రెస్ పార్టీ రాష్ట్ర అధికార ప్రతినిధి, వేమూరు నియోజకవర్గ సమన్వయకర్త వరికూటి అశోక్ బాబు తన ఓటు హక్కును కుటుంబ సమేతంగా వినియోగించుకున్నారు. కూచిపూడి గ్రామంలోని పీఎస్ నెంబర్ 89 పోలింగ్ కేంద్రానికి ఉదయమే చేరుకున్న అశోక్ బాబు, తన కుటుంబ సభ్యులతో కలిసి క్యూలైన్లో నిలబడి ఓటు వేశారు. ఆయన వెంట భార్య వరికూటి లక్ష్మీ, కుమారుడు యువ నాయకులు వరికూటి గౌతమ్, కుటుంబ సభ్యులు ఉన్నారు. ఓటు వేసిన అనంతరం పోలింగ్ కేంద్రం ముందు వేలిపై చెరగని సిరా గుర్తును చూపిస్తూ కుటుంబ సభ్యులతో కలిసి ఫోటోకు ఫోజిచ్చారు.ఈ సందర్భంగా వరికూటి అశోక్ బాబు మాట్లాడుతూ, ప్రతి ఒక్కరూ ప్రజాస్వామ్యంలో భాగస్వాములు కావాలన్నారు. ఓటు అనేది కేవలం మన హక్కు మాత్రమే కాదు, మన బాధ్యత కూడా అని ఆయన అన్నారు. తమ కుటుంబం అంతా కలిసి ఓటు వేయడం చాలా సంతోషంగా ఉందని, ఇది తమ పిల్లలకు కూడా మంచి సందేశం ఇస్తుందన్నారు.మీ ఓటు - మీ భవిష్యత్తు, మీ ఓటు - మీ పిల్లల భవిష్యత్తు అని గుర్తుచేసిన ఆయన, ఇంకా ఓటు వేయని ఓటర్లు వెంటనే తమ సమీప పోలింగ్ కేంద్రాలకు వెళ్లి తమ ఓటు హక్కును వినియోగించుకోవాలని పిలుపునిచ్చారు. ఓటు వేయడం ద్వారానే మన గ్రామ అభివృద్ధిని, మన భవిష్యత్తును మనమే నిర్ణయించుకుంటామని ఆయన పేర్కొన్నారు.పోలింగ్ కేంద్రం వద్ద ఓటర్లు ప్రశాంతంగా ఓటు వేస్తున్న తీరును ఆయన పరిశీలించి, ఎన్నికల సిబ్బంది, పోలీసుల ఏర్పాట్ల పట్ల సంతృప్తి వ్యక్తం చేశారు.