అక్రమంగా టపాసులు నిల్వ చేసినా.. విక్రయించినా కఠిన చర్యలు

నరసరావుపేట, న్యూస్ : జిల్లా లో అనుమతులు లేకుండా అక్రమంగా టపాసులు నిల్వ చేసినా, విక్రయించినా ఉపేక్షించేది లేదని పల్నాడు జిల్లా ఎస్పీ జగదీష్ అదహళ్లి హెచ్చరించారు. నిబంధనలు ఉల్లంఘించిన వారిపై పేలుడు పదార్థాల చట్టం ప్రకారం కఠిన చర్యలు తీసుకుంటామని స్పష్టం చేశారు. దీపావళి నేపథ్యంలో బాణసంచా విక్రయదారులు, ప్రజలు తప్పనిసరిగా భద్రతా ప్రమాణాలు పాటించాలని సూచించారు. బాణసంచా విక్రయించాలంటే తప్పనిసరిగా అధికారిక లైసెన్స్ కలిగి ఉండాలని ఎస్పీ పేర్కొన్నారు. ప్రభుత్వం నిర్దేశించిన బహిరంగ ప్రదేశాల్లోనే, నిర్ణీత ప్రమాణాల ప్రకారం ప్రత్యేక షెడ్లు ఏర్పాటు చేసుకోవా లని సూచించారు. ప్రతి దుకాణంలో నీరు, ఇసుకతో పాటు అగ్నిమాపక పరికరాలను అందుబాటులో ఉంచుకోవాలని ఆదేశించారు. ప్రమాదాల నివారణకు ప్రజలకు అవగాహన కల్పించే సూచిక బోర్డులను ఏర్పాటు చేయాలని, విక్రయ కేంద్రాల్లో బాలకార్మికులను పనిలో పెట్టుకోరాదని స్పష్టం చేశారు. అనుమతు లు లేకుండా బాణసంచా నిల్వ చేసినా తయారు చేసినా, విక్రయించినా చట్టపరమైన చర్యలు తప్పవని ఎస్పీ హెచ్చరించారు. నిబంధనల ఉల్లంఘన లను గుర్తించేందుకు ప్రత్యేక పోలీసు బృందాలను ఏర్పాటు చేసినట్లు వెల్లడించారు. జిల్లావ్యాప్తంగా అక్రమ బాణసంచా వ్యాపారంపై నిఘా కొనసాగు తుందని తెలిపారు. ఈ సందర్భంగా జిల్లా ఎస్పీ మాట్లాడుతూ  దీపావళి పండుగను ప్రజలంతా సురక్షితంగా జరుపుకోవాలని ఎస్పీ కోరారు. జిల్లాలో ఎక్కడైనా అక్రమంగా టపాసులు నిల్వ చేసినా, విక్రయిస్తున్నా వెంటనే సమీప పోలీస్‌స్టేషన్‌కు లేదా జిల్లా ఎస్పీ కార్యాలయానికి సమాచారం అందించాలని సూచించారు. సమాచారం ఇచ్చిన వారి వివరాలను గోప్యంగా ఉంచుతామని తెలిపారు. బాణసంచా వల్ల ఏదైనా ప్రమాదం సంభవిస్తే వెంటనే పోలీసులకు సమాచారం అందించాలని ఎస్పీ జగదీష్ అదహళ్లి విజ్ఞప్తి చేశారు.