భట్టిప్రోలు మండలంలో 68.35 శాతం పోలింగ్

భట్టిప్రోలు, మేజర్ న్యూస్: భట్టిప్రోలు మండల పరిధిలో గురువారం జరిగిన జడ్పీటీసీ, ఎంపీటీసీ ఎన్నికలలో మొత్తం 68.35 శాతం పోలింగ్ నమోదైనట్లు ఎన్నికల ప్రిసైడింగ్ అధికారీ డాక్టర్ ఎన్ దేవలక్ష్మి తెలిపారు. ఈ సందర్భంగా ఆమె మాట్లాడుతూ మండల వ్యాప్తంగా ఉన్న 52 పోలింగ్ స్టేషన్ల పరిధిలో 42,122 మంది ఓటర్లు ఉండగా, అందులో 28,790 మంది తమ ఓటు హక్కును వినియోగించుకున్నారన్నారు.
పోలింగ్ లో మహిళా ఓటర్లు పురుషుల కంటే ఎక్కువగా పాల్గొన్నారు. మొత్తం 14,029 మంది పురుషులు, 14,761 మంది మహిళలు ఓటు వేశారు. మండలంలో అత్యధిక పోలింగ్ పల్లికోన సెగ్మెంట్ లో నమోదైందన్నారు. పల్లికోనలో 78.41 శాతం పోలింగ్ నమోదు కాగా, గొరిగపూడి సెగ్మెంట్ లో 73.52 శాతం, కొనేటిపురం సెగ్మెంట్ లో 73.21 శాతం, సూరేపల్లిలో 72.43 శాతం పోలింగ్ నమోదైంది. అత్యల్ప పోలింగ్ భట్టిప్రోలు-4 సెగ్మెంట్ లో 61.55 శాతంగా నమోదైంది. భట్టిప్రోలు మండలంలోని మిగిలిన సెగ్మెంట్లలో ఐలవరం 68.53 శాతం, పెసర్లంక 68.38 శాతం, పెదపులివర్రు 68.75 శాతం, భట్టిప్రోలు-1 లో 66.60 శాతం, భట్టిప్రోలు-3 లో 65.12 శాతం, భట్టిప్రోలు-2 లో 64.57 శాతం, వెల్లటూరు-1 లో 64.29 శాతం, వెల్లటూరు-2 లో 66.78 శాతం, ఓలేరులో 64.17 శాతం పోలింగ్ నమోదైనట్లు అధికారులు వెల్లడించారు. మండలంలో ఎన్నికలు ఎటువంటి అవాంఛనీయ సంఘటనలు లేకుండా ప్రశాంతంగా ముగిశాయని, ఓట్ల లెక్కింపు అనంతరం ఫలితాలు వెల్లడిస్తామని ఎన్నికల అధికారులు తెలిపారు.