ప్రభుత్వ ఆసుపత్రుల్లో ప్రసవాల సంఖ్య 70 శాతానికి పెంచాలి.. - కలెక్టర్ శ్రీహర్ష

సూర్య - పెద్దపల్లి : ప్రభుత్వ ఆసుపత్రుల్లో ప్రసవాల సంఖ్యను ప్రస్తుతమున్న 50 శాతం నుంచి 70 శాతానికి పెంచాలని జిల్లా కలెక్టర్ కోయ శ్రీహర్ష వైద్యాధికారులను ఆదేశించారు. గురువారం సమీకృత జిల్లా కలెక్టరేట్‌లో గర్భిణులకు అందుతున్న వైద్య సేవలపై నిర్వహించిన సమీక్షలో కలెక్టర్ మాట్లాడుతూ.. పెద్దపల్లి మాతా శిశు సంరక్షణ ఆసుపత్రిలో నెలకు కనీసం 300, గోదావరిఖని ప్రభుత్వ జనరల్ ఆసుపత్రిలో 200 ప్రసవాలు జరిగేలా చర్యలు తీసుకోవాలన్నారు. ఆశా కార్యకర్తల ద్వారా గర్భిణులను నిరంతరం పర్యవేక్షిస్తూ, ప్రభుత్వ ఆసుపత్రుల్లో అందుబాటులో ఉన్న వైద్య సేవలపై అవగాహన కల్పించాలని సూచించారు. గర్భిణులకు నాణ్యమైన వైద్య సేవలు అందించి ప్రభుత్వ ఆసుపత్రులపై నమ్మకం పెంచాలన్నారు.
అనంతరం జాతీయస్థాయి ఎయిడ్స్ సురక్షిత కార్యక్రమంలో పెద్దపల్లి జిల్లా ప్రథమ స్థానం సాధించి అవార్డులు పొందిన సందర్భంగా వైద్య ఆరోగ్యశాఖ అధికారులు, సిబ్బందిని కలెక్టర్ అభినందించారు.
ఈ సమావేశంలో డీఎంహెచ్‌ఓ డాక్టర్ వై. పవిత్ర, జిల్లా ఆసుపత్రి సూపరింటెండెంట్ డాక్టర్ శ్రీధర్, గోదావరిఖని ప్రభుత్వ జనరల్ ఆసుపత్రి సూపరింటెండెంట్ తదితరులు పాల్గొన్నారు.