ఎంపీటీసీ, జడ్పీటీసీ ఎన్నికల పోలింగ్ సరళిని పరిశీలించిన ప్రత్యేక అధికారి పి. ప్రశాంతి

రావులపాలెం: డాక్టర్ బి.ఆర్. అంబేద్కర్ కోనసీమ జిల్లాలో జరుగుతున్న ఎంపీటీసీ, జడ్పీటీసీ ఎన్నికల పోలింగ్ ప్రక్రియను జిల్లా ఎన్నికల ప్రత్యేక అధికారి పి. ప్రశాంతి క్షేత్రస్థాయిలో పరిశీలించారు. గురువారం ఆలమూరు, రావులపాలెం మండలాల్లోని పలు పోలింగ్ కేంద్రాలను సందర్శించి ఎన్నికల నిర్వహణ తీరును సమీక్షించారు.

రావులపాలెం మండల పరిషత్ ప్రాథమిక పాఠశాలలో ఏర్పాటు చేసిన పోలింగ్ కేంద్రాన్ని సందర్శించి ఓటింగ్ సరళి, ఓటర్ల రాకపోకలు, ఎన్నికల సిబ్బంది విధుల నిర్వహణ, ఓటర్లకు కల్పించిన సౌకర్యాలపై వివరాలు అడిగి తెలుసుకున్నారు.

ఈ సందర్భంగా ఎన్నికల విధుల్లో ఉన్న సిబ్బంది అప్రమత్తంగా ఉండాలని, ఎన్నికల సంఘం మార్గదర్శకాలను కచ్చితంగా పాటించాలని సూచించారు. పోలింగ్‌లో ఎలాంటి అవకతవకలకు తావులేకుండా నిష్పక్షపాతంగా విధులు నిర్వహించాలని ఆదేశించారు. ప్రతి ఓటరు స్వేచ్ఛగా, నిర్భయంగా ఓటు వేసేలా అవసరమైన ఏర్పాట్లు చేయాలని తెలిపారు.

పోలింగ్ ప్రక్రియ ప్రశాంతంగా, పారదర్శకంగా పూర్తయ్యేలా ఎన్నికల, పోలీసు అధికారులు సమన్వయంతో పనిచేయాలని సూచించారు.

ఆమె వెంట హార్టికల్చర్ జేడీ బి. రమణ, ఆలమూరు, రావులపాలెం తహసీల్దార్లు, ఎంపీడీవోలు రాజు, వరసుబ్రహ్మణ్యం తదితర అధికారులు పాల్గొన్నారు.