ఐరోపాలో విమానాలకు నకిలీ బాంబు బెదిరింపులు
సూర్య ఇంటర్నేషనల్ డెస్క్, లండన్: ఐరోపా గగనతలంలో పౌర విమానయాన రంగాన్ని వరుస బాంబు బెదిరింపులు తీవ్ర భయాందోళనలకు గురిచేశాయి. బ్రిటన్ నుంచి బయలుదేరిన విమానాలతో సహా ఐరోపావ్యాప్తంగా పలు విమానయాన సంస్థల విమానాలకు ఒకే రోజు బాంబు హెచ్చరికలు అందడంతో అత్యవసర ల్యాండింగ్‌లు, రూట్ డైవర్షన్లు మరియు సైనిక యుద్ధ విమానాల ఎస్కార్ట్‌లతో విమానాశ్రయాల్లో తీవ్ర గందరగోళం నెలకొంది. అయితే విస్తృత తనిఖీల అనంతరం ఇవన్నీ దురుద్దేశపూర్వకంగా చేసిన నకిలీ బెదిరింపులు మాత్రమేనని బ్రిటన్ ప్రభుత్వం, స్థానిక రక్షణ వర్గాలు ధ్రువీకరించాయి.
ఈ పరిణామాల్లో ప్రధానంగా లండన్ హీత్రూ విమానాశ్రయం నుంచి వార్సాకు బయలుదేరిన పోలిష్ ఎయిర్‌లైన్స్ లాట్ (LOT) విమానానికి ముప్పు పొంచి ఉందన్న హెచ్చరిక రావడంతో దానిని నార్త్ పోలాండ్‌లోని మోడ్లిన్ విమానాశ్రయానికి మళ్లించారు. మాంచెస్టర్ నుంచి స్పెయిన్‌లోని ముర్సియాకు బయలుదేరిన ర్యాన్‌ఎయిర్ విమానం అత్యవసరంగా ల్యాండ్ కాగా బాంబ్ స్క్వాడ్ తనిఖీలు నిర్వహించింది. డబ్లిన్ నుంచి రోమ్‌కు వెళ్తున్న మరో ప్రయాణికుల విమానానికి భద్రతా ముప్పు ఏర్పడటంతో ఇటాలియన్ వైమానిక దళానికి చెందిన యూరోఫైటర్ యుద్ధ విమానాలు గాల్లోకి లేచి విమానాన్ని ఎస్కార్ట్ చేసి సురక్షితంగా రోమ్ ఫ్యుమిసినో ఎయిర్‌పోర్టులో దించాయి.
బ్రిటన్, పోలాండ్, స్పెయిన్, బల్గేరియా, ఇటలీలలో విమానాలు, ప్రయాణికుల లగేజీని తనిఖీ చేసిన బాంబ్ డిస్పోజల్ బృందాలకు ఎక్కడా ఎటువంటి పేలుడు పదార్థాలు లభించలేదు. తమ వద్ద అత్యాధునిక ఏవియేషన్ సెక్యూరిటీ వ్యవస్థ ఉందని, ఇటువంటి కుట్రపూరిత ఫేక్ బెదిరింపులను అంచనా వేసేందుకు నిఘా సంస్థలు, అంతర్జాతీయ పోలీసు వర్గాలు సమన్వయంతో పనిచేస్తున్నాయని యూకే అధికార వర్గాలు స్పష్టం చేశాయి. ఈ బెదిరింపుల వెనుక ఉన్న అసలు మూలాలను గుర్తించేందుకు యూరోపియన్ భద్రతా ఏజెన్సీలు ఉమ్మడి విచారణను వేగవంతం చేశాయి.
