అదానీ పోర్ట్స్ భారీ గ్లోబల్ డీల్: ఎవోస్ కొనుగోలు

సూర్య బిజినెస్ డెస్క్, అహ్మదాబాద్: భారతదేశపు అతిపెద్ద ప్రైవేట్ పోర్ట్ ఆపరేటర్ ‘అదానీ పోర్ట్స్ అండ్ స్పెషల్ ఎకనామిక్ జోన్’  అంతర్జాతీయంగా తన ఆధిపత్యాన్ని మరింత విస్తరిస్తూ అతిపెద్ద కొనుగోలు ఒప్పందాన్ని కుదుర్చుకుంది. నెదర్లాండ్స్ ప్రధాన కేంద్రంగా కార్యకలాపాలు సాగిస్తున్న యూరప్‌లోని రెండో అతిపెద్ద స్వతంత్ర లిక్విడ్ స్టోరేజ్ సంస్థ ‘ఎవోస్ బి.వి’ లోని 100 శాతం వాటాను కొనుగోలు చేసేందుకు సంస్థ అంగీకారం తెలిపింది. ఈ డీల్ ఎంటర్‌ప్రైజ్ విలువ 2.56 బిలియన్ యూరోలుగా (సుమారు ₹23,000 కోట్లకు పైగా లేదా 2.88 బిలియన్ డాలర్లు) కాగా, ఈక్విటీ విలువ దాదాపు 1.18 బిలియన్ యూరోలుగా ఉంది.

ఇగ్నియో ఇన్‌ఫ్రాస్ట్రక్చర్ పార్ట్‌నర్స్ నుంచి చేపట్టిన ఈ ఆల్-క్యాష్ ఒప్పందం ద్వారా ఐరోపాలోని కీలక ఇంధన, పారిశ్రామిక కేంద్రాల్లో అదానీ పోర్ట్స్‌కు వ్యూహాత్మక పట్టు లభించనుంది. నెదర్లాండ్స్, జర్మనీ, స్పెయిన్, బెల్జియం, మాల్టాలలో విస్తరించి ఉన్న ఎనిమిది ప్రధాన టెర్మినల్స్‌తో కూడిన 63 లక్షల క్యూబిక్ మీటర్ల లిక్విడ్ స్టోరేజ్ సామర్థ్యం ఇప్పుడు అదానీ ఖాతాలోకి చేరనుంది. ఈ తాజా కొనుగోలుతో అంతర్జాతీయంగా అదానీ పోర్ట్స్ పోర్ట్‌ఫోలియో 10 దేశాల్లోని 28 పోర్టులు మరియు టెర్మినల్స్‌కు విస్తరించనుంది. అంతర్జాతీయ రవాణా మరియు స్థిరమైన ఇంధన సరఫరా గొలుసులో ఈ డీల్ తమ వృద్ధి ప్రయాణానికి అత్యంత కీలక మైలురాయిగా నిలుస్తుందని అదానీ పోర్ట్స్ మేనేజింగ్ డైరెక్టర్ కరణ్ అదానీ పేర్కొన్నారు.