భూసార పరిరక్షణతోనే భవిష్యత్తు వ్యవసాయానికి భరోసా

సూర్య సుల్తానాబాద్ 

 భూసార పరిరక్షణతోనే వ్యవసాయ రంగానికి భవిష్యత్తులో భరోసా ఉంటుందని, రైతులు నేల స్వభావాన్ని తెలుసుకొని పంటలు సాగు చేయాలని మండల వ్యవసాయాధికారి ఈ. పైడితల్లి సూచించారు. వ్యవసాయ శాఖ ఆధ్వర్యంలో నిర్వహిస్తున్న ఖేతి బచావో (Save Farm) ప్రచార కార్యక్రమంలో భాగంగా గర్రెపల్లి గ్రామ రైతు వేదికలో రైతులకు భూసార పరిరక్షణపై అవగాహన కల్పించారు.ఈ సందర్భంగా పైడితల్లి మాట్లాడుతూ రైతులు తమ పొలాల్లో మట్టి నమూనాలను సేకరించి వ్యవసాయ శాఖకు అందజేస్తే ప్రయోగశాలకు పంపించి భూసార పరీక్షల ఫలితాలను అందిస్తామని తెలిపారు. ప్రజా పాలన ప్రగతి ప్రణాళికలో భాగంగా గత సీజన్‌లో సేకరించిన మట్టి నమూనాల ఫలితాలను రైతులకు పంపిణీ చేస్తూ, వాటి ఆధారంగా సిఫారసు చేసిన ఎరువులనే వినియోగించాలని సూచించారు.కార్యక్రమానికి హాజరైన తెలంగాణ రైతు విజ్ఞాన కేంద్రం, పెద్దపల్లికి చెందిన శాస్త్రవేత్త డా. ఓదెల సంపత్ మాట్లాడుతూ ఎల్‌నినో ప్రభావంతో వర్షాభావ పరిస్థితులు ఏర్పడే అవకాశాలను దృష్టిలో ఉంచుకొని రైతులు వరి పంటకు ప్రత్యామ్నాయంగా మొక్కజొన్న, జొన్న, అపరాల వంటి ఆరుతడి పంటలను సాగు చేయాలని సూచించారు. అలాగే వరి కోత అనంతరం మిగిలే కొయ్యకాళ్లను తగులబెట్టకుండా భూమిలోనే కలియదున్నడం ద్వారా భూసారం పెంపొందించుకోవచ్చని వివరించారు.ఈ కార్యక్రమంలో మండల వ్యవసాయాధికారి, గర్రెపల్లి ఏఈఓ ఆనందరావు, గ్రామ రైతులు పాల్గొన్నారు.