మైనింగ్ నిర్లక్ష్యానికి ఇద్దరు గొర్రెల కాపర్లు బలి.. గుంతలో పడి ఇద్దరి దుర్మరణం

ధారూర్, మేజర్ న్యూస్: వికారాబాద్ జిల్లా ధారూర్ మండలం తరిగోపుల గ్రామంలో తీవ్ర విషాదం చోటుచేసుకుంది. మైనింగ్ గుంతలో పడి ఇద్దరు గొర్రెల కాపర్లు ప్రాణాలు కోల్పోయిన ఘటన గ్రామంలో తీవ్ర కలకలం రేపింది. స్థానికులు తెలిపిన వివరాల ప్రకారం.. తరిగోపుల గ్రామానికి చెందిన సకిల్లా శ్రీనివాస్ (43), మున్నూరు అశోక్ (21) గొర్రెలను మేపేందుకు వెళ్లారు. ఈ క్రమంలో ప్రమాదవశాత్తు మైనింగ్ తవ్వకాలతో ఏర్పడిన గుంతలో పడిపోవడంతో ఇద్దరూ అక్కడికక్కడే మృతి చెందినట్లు స్థానికులు తెలిపారు. మైనింగ్ నిర్వహణలో కనీస భద్రతా ప్రమాణాలు పాటించకపోవడం, ప్రమాదకరమైన గుంతల వద్ద ఎలాంటి రక్షణ చర్యలు చేపట్టకపోవడమే ప్రమాదానికి కారణమని గ్రామస్థులు, మృతుల కుటుంబ సభ్యులు ఆరోపిస్తున్నారు. మైనింగ్ నిర్వాహకుల నిర్లక్ష్యంపై ఆగ్రహం వ్యక్తం చేస్తూ బాధ్యులపై సమగ్ర విచారణ జరిపి కఠిన చర్యలు తీసుకోవాలని డిమాండ్ చేస్తున్నారు. మైనింగ్ యజమానులతో పాటు సంబంధిత అధికారులు కూడా భద్రతా చర్యల పర్యవేక్షణలో బాధ్యత వహించాలని కోరుతున్నారు. ఒకే ప్రమాదంలో ఇద్దరు ప్రాణాలు కోల్పోవడంతో తరిగోపుల గ్రామంలో విషాద ఛాయలు అలముకున్నాయి. మృతుల కుటుంబ సభ్యుల రోదనలు గ్రామస్థులను కలచివేశాయి.