telangana
అర్హులైన కుటుంబాలు బీమా నమోదును సద్వినియోగం చేసుకోవాలి
సూర్య, మందమర్రి : కుటుంబ పెద్దకు అనుకోని ప్రమాదం ఎదురైనా ఆ కుటుంబం ఆర్థికంగా ఇబ్బందులు పడకుండా అండగా నిలవాలనే లక్ష్యంతో రాష్ట్ర ప్రభుత్వం అమలు చేస్తున్న ఇందిరమ్మ కుటుంబ జీవిత బీమా పథకం నమోదు ప్రక్రియకు మందమర్రి పురపాలక సంఘం శ్రీకారం చుట్టింది. పట్టణంలోని అర్హులైన కుటుంబాలన్నీ ఈ అవకాశాన్ని వినియోగించుకోవాలని మున్సిపల్ కమిషనర్ తుంగపిండి రాజలింగు కోరారు. తెల్ల రేషన్ కార్డు కలిగిన ప్రతి కుటుంబంలో 18 నుంచి 59 సంవత్సరాల వయస్సు గల సంపాదించే సభ్యుడికి రూ.5 లక్షల జీవిత బీమా కల్పించేందుకు ప్రభుత్వం నిర్ణయించినట్లు తెలిపారు. ఇందులో భాగంగా శనివారం ఉదయం 10 గంటలకు 19వ వార్డులోని మున్సిపల్ కార్యాలయంలో తొలి నమోదు కేంద్రాన్ని ప్రారంభించనున్నట్లు వెల్లడించారు. నమోదు కోసం బీమా పొందే వ్యక్తి ఆధార్ కార్డుతో స్వయంగా హాజరుకావాలని సూచించారు. కుటుంబ రేషన్ కార్డు, సభ్యుల ఆధార్ కార్డులు, సంపాదించే వ్యక్తి మొబైల్ నంబర్, నామినీ వివరాలను వెంట తీసుకురావాలని తెలిపారు. ఒకరి కంటే ఎక్కువ మంది నామినీలు ఉంటే వారికి కేటాయించాల్సిన బీమా వాటాల వివరాలను కూడా నమోదు సమయంలో తెలియజేయాలని పేర్కొన్నారు. మిగిలిన వార్డుల్లోనూ దశలవారీగా నమోదు కేంద్రాలను ఏర్పాటు చేస్తామని, వాటి వివరాలను త్వరలో ప్రకటిస్తామని కమిషనర్ తెలిపారు. ప్రభుత్వ పథకం ద్వారా లభించే రూ.5 లక్షల బీమా భద్రతను అర్హులైన కుటుంబాలు కోల్పోకుండా నిర్ణీత కేంద్రాల్లో వివరాలు నమోదు చేసుకోవాలని సూచించారు.