ఆపదలో ఉన్న ఖాతాదారుడి కుటుంబానికి గాయత్రి బ్యాంకు ఆర్థిక భరోసా

సూర్య, మంచిర్యాల : ఖాతాదారులకు బ్యాంకింగ్ సేవలతో పాటు ఆర్థిక భద్రత కల్పించడంలో గాయత్రి కో-ఆపరేటివ్ అర్బన్ బ్యాంకు ముందుంటోంది. ఇందులో భాగంగా ప్రమాదవశాత్తు మృతిచెందిన మంచిర్యాల శాఖ ఖాతాదారుడు నజీర్ మొహమ్మద్ కుటుంబానికి బ్యాంకు ప్రమాద బీమా ద్వారా రూ.2 లక్షల ఆర్థిక సహాయం అందించింది. మృతుడి భార్య ఫాతిమా బీకి మంచిర్యాల కార్పొరేటర్ మహమ్మద్ గౌసుద్దీన్ చేతుల మీదుగా గురువారం బీమా చెక్కును అందజేశారు. ఈ సందర్భంగా కార్పొరేటర్ మాట్లాడుతూ బ్యాంకు అందిస్తున్న ప్రమాద బీమా సదుపాయం బాధిత కుటుంబానికి ఎంతో ఉపయోగకరంగా ఉంటుందని అన్నారు. ఖాతాదారులకు ఆర్థిక భద్రత కల్పించడంతో పాటు, రైతులకు ఏడాదికి 10.50 శాతం వడ్డీతో వ్యవసాయ రుణాలు అందించడం అభినందనీయమన్నారు. పరిసర గ్రామాల్లో బ్యాంకింగ్ కరస్పాండెంట్లను ఏర్పాటు చేసి పెన్షనర్లు, ఇతర ఖాతాదారులకు గ్రామస్థాయిలోనే బ్యాంకింగ్ సేవలు అందుబాటులోకి తీసుకురావడాన్ని ప్రశంసించారు. బ్రాంచి మేనేజర్ కేలేటి ప్రవీణ్ మాట్లాడుతూ ఖాతాదారులకు నిరంతర సేవలు అందించడమే లక్ష్యంగా బ్యాంకు పనిచేస్తోందని తెలిపారు. 24 గంటల పాటు ఏటీఎంలలో నగదు అందుబాటులో ఉంచుతున్నామని, బంగారు ఆభరణాలపై తక్కువ వడ్డీతో గ్రాముకు గరిష్ఠంగా రూ.10 వేల వరకు రుణాలు మంజూరు చేస్తున్నామని వివరించారు. సేవింగ్స్ ఖాతాల ప్రారంభానికి అవసరమైన ఫొటోలు, జిరాక్స్ ప్రతులను బ్యాంకులో ఉచితంగా అందిస్తున్నామని చెప్పారు. వ్యాపారుల అవసరాలకు అనుగుణంగా వ్యాపార రుణాలు, రైతులకు వ్యవసాయ రుణాలు కల్పిస్తున్నామని పేర్కొన్నారు. కిసాన్ వికాస్ పత్రాలు, పోస్టాఫీస్ డిపాజిట్లపై సైతం 10 శాతం వార్షిక వడ్డీ రేటుతో రుణ సదుపాయం అందిస్తున్నట్లు తెలిపారు. బ్యాంకు అందిస్తున్న వివిధ సేవలను ప్రజలు సద్వినియోగం చేసుకోవాలని కోరారు. ఈ కార్యక్రమంలో జి. సుధాకర్, సీనియర్ ఆఫీసర్ ఆర్. రమేష్, జూనియర్ ఆఫీసర్ ఇ. శివకుమార్ తదితరులు పాల్గొన్నారు.