సింగారంలో ఘనంగా ఎంగిలిపూల బతుకమ్మ వేడుకలు

మునుగోడు,మేజర్ న్యూస్:;తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు మునుగోడు మండలంలోని సింగారం గ్రామంలో ఘనంగా ప్రారంభమయ్యాయి. బతుకమ్మ సంబరాల్లో భాగంగా నిర్వహించిన ఎంగిలిపూల బతుకమ్మ వేడుకల్లో గ్రామ మహిళలు అధిక సంఖ్యలో పాల్గొని సందడి చేశారు.
ఈ సందర్భంగా మహిళలు వివిధ రకాల పూలతో బతుకమ్మలను అందంగా పేర్చి, సంప్రదాయ దుస్తుల్లో గ్రామంలో పండుగ వాతావరణాన్ని నెలకొల్పారు. బతుకమ్మ పాటలు పాడుతూ, కోలాటాలు, ఆటపాటలతో ఉత్సాహంగా వేడుకల్లో పాల్గొన్నారు. తెలంగాణ ఆడపడుచుల ఆత్మీయతకు, ప్రకృతి ఆరాధనకు ప్రతీకగా నిలిచే బతుకమ్మ పండుగను సంప్రదాయబద్ధంగా జరుపుకుంటూ తమ సాంస్కృతిక వారసత్వాన్ని చాటిచెప్పారు.
గ్రామ మహిళలంతా ఒకచోట చేరి ఆనందోత్సాహాల మధ్య బతుకమ్మ వేడుకలను జరుపుకోవడంతో సింగారం గ్రామంలో పండుగ శోభ సంతరించుకుంది. తెలంగాణ సంస్కృతి, సంప్రదాయాలను భావితరాలకు అందించేలా ప్రతి ఏటా బతుకమ్మ వేడుకలను ఉత్సాహంగా నిర్వహించుకుంటామని మహిళలు పేర్కొన్నారు. ఈ కార్యక్రమంలో మహిళలలు,గ్రామ పెద్దలు పాల్గొన్నారు.