ఆల్ఫోర్స్ హైస్కూల్లో బతుకమ్మ సంబరాలు

హుస్నాబాద్ ; ఆల్ఫోర్స్ ఈ-టెక్నో స్కూల్లో బతుకమ్మ సంబరాలను ఘనంగా నిర్వహించారు. రంగురంగుల పూలతో అలంకరించిన బతుకమ్మల మధ్య విద్యార్థినీ విద్యార్థులు, మహిళలు ఉత్సాహంగా పాల్గొని పండుగ వాతావరణాన్ని నెలకొల్పారు. చిన్నారుల ఆటపాటలు, మహిళల కోలాహలంతో పాఠశాల ప్రాంగణం సందడిగా మారింది.ఈ కార్యక్రమానికి ఆల్ఫోర్స్ విద్యాసంస్థల చైర్మన్ వుట్కూరి నరేందర్ రెడ్డి ముఖ్య అతిథిగా హాజరయ్యారు. బతుకమ్మ పండుగ తెలంగాణ సంస్కృతి, సంప్రదాయాలకు ప్రతీకగా నిలుస్తుందని, ఇలాంటి వేడుకల ద్వారా విద్యార్థుల్లో మన సంస్కృతి పట్ల అవగాహన, సంప్రదాయాల పట్ల గౌరవం పెంపొందుతాయని పేర్కొన్నారు.రంగురంగుల పూలతో అందంగా పేర్చిన బతుకమ్మల చుట్టూ మహిళలు, చిన్నారులు ఉత్సాహంగా ఆటపాటలతో సందడి చేశారు. ఆనందోత్సాహాల మధ్య బతుకమ్మ వేడుకలు అంబరాన్నంటాయి. విద్యార్థుల్లో సాంస్కృతిక విలువలను పెంపొందించడంతో పాటు సంప్రదాయ పండుగల విశిష్టతను తెలియజేసేలా ఈ కార్యక్రమం నిర్వహించారు.ఈ వేడుకల్లో విద్యార్థినీ విద్యార్థులు, తల్లిదండ్రులు, ఉపాధ్యాయినీ ఉపాధ్యాయులు, పాఠశాల సిబ్బంది పాల్గొని బతుకమ్మ సంబరాలను విజయవంతం చేశారు.