బతుకమ్మ సంబరం.. జేబీఎంలో పూల సందడి!
చౌటుప్పల్‌, మేజర్ న్యూస్: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను చౌటుప్పల్‌ మున్సిపల్‌ కేంద్రంలోని జేబీఎం ఒకేషనల్‌ జూనియర్‌ కళాశాలలో ఘనంగా నిర్వహించారు. విద్యార్థినులు సంప్రదాయ దుస్తుల్లో బతుకమ్మలను పేర్చి, ఆటపాటలతో సందడి చేశారు. పూల పండుగ వేడుకలతో కళాశాల ప్రాంగణం సందడిగా మారింది.
ఈ కార్యక్రమానికి ముఖ్య అతిథిగా హాజరైన మున్సిపల్‌ చైర్‌పర్సన్‌ మొగుదాల పావని రమేష్‌ గౌడ్‌ మాట్లాడుతూ.. బతుకమ్మ తెలంగాణ సంస్కృతి, సంప్రదాయాలకు ప్రతీక అని పేర్కొన్నారు. ఇలాంటి వేడుకలతో విద్యార్థుల్లో మన సంస్కృతి, సంప్రదాయాల పట్ల అవగాహన పెరుగుతుందని తెలిపారు.
ఈ సందర్భంగా చైర్‌పర్సన్‌ మొగుదాల పావని రమేష్‌ గౌడ్‌ను కళాశాల ప్రిన్సిపాల్‌ గంగాపురం జంగయ్య, కరస్పాండెంట్‌ గంగాపురం నిర్మల ఘనంగా సన్మానించారు. కార్యక్రమంలో ఉపాధ్యాయులు మాధవి, రంజిత్‌, యువరాజు, జ్యోతి, సుష్మ, మమత తదితరులు పాల్గొన్నారు.
