జలసిరి నీటి కుంటల్లో గంగపుత్రులకు చేపల పెంపకానికి అవకాశం కల్పించాలి

హైదరాబాద్: తెలంగాణ రాష్ట వ్యాప్తంగా జలసిరి పథకం కింద నిర్మించనున్న సుమారు 50,000 నీటి కుంటల్లో సంప్రదాయ మత్స్యకారులైన గంగపుత్రులకు చేపల పెంపకం, మత్స్యకార వృత్తి నిర్వహణకు అవకాశం కల్పించి, వారి జీవనోపాధిని మరింత మెరుగుపరచాలని తెలంగాణ గంగపుత్ర సంఘం రాష్ట కార్యదర్శి టుంగుటూరి రాజేష్ ఖన్నా కోరారు.

ఈ మేరకు హైదరాబాద్‌లోని తెలంగాణ రాష్ట మత్స్యశాఖ డైరెక్టర్ కార్యాలయంలో అడిషనల్ డైరెక్టర్ డాక్టర్ ఎస్. మురళీకృష్ణను కలిసి గంగపుత్ర సంఘం తరఫున వినతి పత్రం సమర్పించారు.

రాష్ట్రంలో తరతరాలుగా మత్స్యకార వృత్తినే జీవనాధారంగా చేసుకుని జీవిస్తున్న గంగపుత్ర కుటుంబాలకు జలసిరి పథకం ద్వారా నిర్మించనున్న నీటి కుంటలు ఉపాధి అవకాశాలుగా మారేలా ప్రభుత్వం చర్యలు తీసుకోవాలని రాజేష్ ఖన్నా విజ్ఞప్తి చేశారు. నీటి కుంటల్లో చేపల పెంపకం, సంరక్షణ, వేట తదితర మత్స్యవృత్తి కార్యకలాపాల్లో సంప్రదాయ మత్స్యకారులకు ప్రాధాన్యత కల్పించాలని కోరారు

ఈ కుంటలను స్థానిక గంగపుత్ర మత్స్యకార సంఘాలకు అందుబాటులోకి తీసుకురావడం ద్వారా వారికి స్థిరమైన ఉపాధి, ఆదాయ వనరులు ఏర్పడి, వారి కుటుంబాల ఆర్థిక పరిస్థితి మెరుగుపడటంతో పాటు సంప్రదాయ మత్స్యకార వృత్తి పరిరక్షణకు దోహదపడుతుందని ఆయన పేర్కొన్నారు

ప్రభుత్వం గంగపుత్రుల అభ్యర్థనను సానుకూలంగా పరిశీలించి, జలసిరి పథకంలోని నీటి కుంటల్లో చేపల పెంపకం మరియు మత్స్యకార వృత్తి నిర్వహణకు తగిన విధంగా అవకాశాలు కల్పించాలని తెలంగాణ గంగపుత్ర సంఘం తరఫున కోరారు