నిరాధార ఆరోపణలతో మా ఉపాధి హరించొద్దు!*

*-ఫార్మా పరిశ్రమలు మూతపడితే వేలాది కుటుంబాలు రోడ్డున పడుతాయి*

*-పీసీబీ,కలెక్టర్ కు ఫార్మా ఉద్యోగుల విజ్ఞప్తి*

యాదాద్రి భువనగిరి ప్రతినిధి, మేజర్ న్యూస్
నిరాధార ఆరోపణలతో ఫార్మా పరిశ్రమలు మూతపడే పరిస్థితి రాకుండా చూడాలని ఉద్యోగులు ప్రభుత్వాన్ని కోరారు. పరిశ్రమలు మూతపడితే వేలాది మంది ఉద్యోగులు, వారి కుటుంబాలు ఉపాధి కోల్పోయే ప్రమాదం ఉందని ఆవేదన వ్యక్తం చేశారు.యాదాద్రి భువనగిరి జిల్లా భూదాన్‌పోచంపల్లి మండలం దోతి గూడెం, అంతమ్మగూడెం గ్రామాల పరిధిలోని సెజ్‌లో ఉన్న హేజలో ల్యాబ్స్, బృందావన్ లేబరేటరీస్, వీజే సాయి కెమ్, ఎస్వీఆర్ లేబరేటరీస్ తదితర సంస్థల్లో పనిచేస్తున్న ఉద్యోగులు మంగళవారం నల్లగొండలోని కాలుష్య నియంత్రణ మండలి (పీసీబీ) ప్రాంతీయ కార్యాలయంలో వినతిపత్రం సమర్పించారు.అంతకుముందు యాదాద్రి భువనగిరి జిల్లా కలెక్టర్ అనురాగ్ జయంతికి వినతిపత్రం అందజేశారు.
*వాస్తవాలు పరిశీలించాకే చర్యలు*
కొంతమంది వ్యక్తులు స్వార్థ ప్రయోజనాల కోసం ఫార్మా కంపెనీలపై వరుసగా ఆరోపణలు చేస్తున్నారని ఉద్యోగులు పేర్కొన్నారు. ప్రభుత్వం నిర్దేశించిన మార్గదర్శకాలకు అనుగుణంగా పరిశ్రమలు ఏర్పాటయ్యాయని, వాటి ద్వారా తమకు ఉపాధి లభిస్తోందని తెలిపారు. కంపెనీలపై వచ్చే ప్రతి ఫిర్యాదునూ అధికారులు క్షేత్రస్థాయిలో సమగ్రంగా పరిశీలించి, వాస్తవాలు నిర్ధారించిన తర్వాతే చర్యలు తీసుకోవాలని కోరారు.
*నిబంధనల ఉల్లంఘనపై చర్యలకు మద్దతు*
కాలుష్య నియంత్రణ, పర్యావరణ పరిరక్షణ, ప్రజారోగ్యం, భద్రత విషయంలో నిబంధనలు ఉల్లంఘించే సంస్థలపై చర్యలు తీసుకోవడాన్ని తాము వ్యతిరేకించబోమని ఉద్యోగులు స్పష్టం చేశారు.అయితే ఆధారాలు లేని ఆరోపణలతో పరిశ్రమలు మూతపడితే తమ కుటుంబాల జీవనోపాధి దెబ్బతింటుందని ఆందోళన వ్యక్తం చేశారు.
*వేలాది కుటుంబాలపై ప్రభావం*
పీసీబీ అధికారులు వివిధ సందర్భాల్లో కమిటీలు ఏర్పాటు చేయడం, ఫిర్యాదులపై చర్యలు తీసుకునే క్రమంలో చిన్న, పెద్ద పరిశ్రమలు ఇబ్బందులకు గురవుతున్నాయని ఉద్యోగులు తెలిపారు. పరిశ్రమలు మూతపడితే సుమారు 6 వేల మంది ఉద్యోగులు, వారి కుటుంబాలు రోడ్డున పడే పరిస్థితి ఉంటుందని పేర్కొన్నారు. పరిశ్రమలు నిబంధనలు పాటించేలా పర్యవేక్షిస్తూ.. తమ ఉపాధికి భద్రత కల్పించాలని ప్రభుత్వాన్ని, పీసీబీ అధికారులను కోరారు.