సోలార్ విద్యుత్‌తో పేదలకు భారీ ప్రయోజనం

పామూరు, మేజర్ న్యూస్ :  

సేవా సంకల్ప్ అభియాన్ కార్యక్రమంలో భాగంగా మంగళవారం పామూరు ఆర్‌అండ్‌బీ గ్రౌండ్‌లో విద్యుత్ శాఖ  డీఈ డి. వెంకట కృష్ణారెడ్డి ఆధ్వర్యంలో నిర్వహించిన సేవా సేతు అభియాన్ కార్యక్రమంలో మాజీ బీజేపీ రాష్ట్ర కార్యవర్గ సభ్యులు కొండిశెట్టి వెంకటరమణయ్య పాల్గొన్నారు. ఈ సందర్భంగా ఆయన మాట్లాడుతూ ప్రధానమంత్రి నరేంద్ర మోదీ నేతృత్వంలోని కేంద్ర ప్రభుత్వం కార్పొరేషన్లు మున్సిపాలిటీలు, గ్రామీణ, పట్టణ ప్రాంతాల్లో నివసించే బడుగు బలహీన వర్గాలు, పేద ప్రజలను దృష్టిలో ఉంచుకుని అనేక సంక్షేమ పథకాలను అమలు చేస్తోందన్నారు. ఎస్సీ, ఎస్టీ వర్గాలకు ఉచితంగా సౌర విద్యుత్ ప్లాంట్లను అందించడంతో పాటు ప్రతి ఒక్కరికీ మూడు కిలోవాట్ల సోలార్ విద్యుత్ ప్లాంట్ ఏర్పాటుకు రూ.78 వేల సబ్సిడీ అందిస్తుందని తెలిపారు. మిగిలిన రూ.1,22,000లను 6 శాతం వడ్డీతో బ్యాంకుల ద్వారా రుణ సౌకర్యం కల్పిస్తున్నట్లు పేర్కొన్నారు. ఈ పథకం ద్వారా ప్రజలు అధిక మొత్తంలో విద్యుత్‌ను వినియోగించుకోవడంతో పాటు విద్యుత్ బిల్లుల భారాన్ని గణనీయంగా తగ్గించుకుని డబ్బును ఆదా చేసుకునే అవకాశం కలుగుతుందని కొండిశెట్టి వెంకటరమణయ్య తెలిపారు. కార్యక్రమంలో ఏఈ షేక్ . జిలాని, బీజేపీ జిల్లా కార్యవర్గ సభ్యులు కొప్పరపు వెంకట సుబ్బారావు, పోశం సూర్యచంద్రరావు, బొంతల అజరత్ కుమార్, తెలుగుదేశం నాయకులు, మాజీ సర్పంచ్ సోమిశెట్టి వెంకటనారాయణ, పత్తు మస్తాన్, పిడుగు శ్రీనివాసులు, వాయినేని రాఘవ, విద్యుత్ శాఖ అధికారులు, బ్యాంకు అధికారులు, సారా ప్రాజెక్ట్ కంపెనీ ప్రతినిధులు తదితరులు పాల్గొన్నారు.