ఇంటి ముంగిట అక్షరం... ఉమ జీవితంలో వెలుగుల విప్లవం!

పార్వతీపురం, అక్టోబర్ 6, మేజర్ న్యూస్ : ఆంధ్రప్రదేశ్ ప్రభుత్వం చేపట్టిన 'ఉల్లాస్ - అక్షర ఆంధ్ర 2025-2026 కార్యక్రమంలో భాగంగా పార్వతీపురం మన్యం జిల్లా, సీతంపేట మండలం, గోయిది గ్రామానికి చెందిన శ్రీమతి బిడ్డిక ఉమ సాధించిన విజయగాథ సమగ్ర సాధికారతకు ఒక ఉత్తమ ప్రతీకగా నిలుస్తోంది. ఒకప్పుడు నిరక్షరాస్యురాలై, కేవలం ఇంటికే పరిమితమైన బిడ్డిక ఉమ 2025లో ఈ కార్యక్రమంలో చేరి వాలంటీర్ల మార్గదర్శకత్వంలో క్రమం తప్పకుండా తరగతులకు హాజరయ్యారు. ఆ ఆసక్తితో తెలుగు అక్షరాలు, సంఖ్యలు, ప్రాథమిక గణిత నైపుణ్యాలను వేగంగా నేర్చుకోవడమే కాకుండా, తన జీవితాన్ని సరికొత్త మలుపు తిప్పుకున్నారు.   ​అక్షరాస్యత సాధించిన తర్వాత ఆమె ఆర్థికంగా, వాణిజ్యపరంగా ఎంతో పురోగతి సాధించారు. గతంలో చిన్న చిన్న విషయాలకు ఇతరులపై ఆధారపడే ఆమె, ఇప్పుడు స్వయంగా బ్యాంకులకు వెళ్లి నగదు డిపాజిట్, విత్‌డ్రా లావాదేవీలు చేసుకోగలుగుతున్నారు. డ్వాక్రా సంఘాల ద్వారా రుణం పొంది, కొబ్బరికాయలు, నూనెలు అమ్మే ఒక చిన్న దుకాణాన్ని ప్రారంభించి విజయవంతంగా నడుపుతున్నారు. మారుతున్న కాలానికి అనుగుణంగా డిజిటల్ నైపుణ్యాలను కూడా పుణికిపుచ్చుకున్న ఉమ తన వ్యాపారంలో స్మార్ట్‌ఫోన్ సహాయంతో PhonePe, GPay వంటి యూపీఐ (UPI) డిజిటల్ చెల్లింపులను స్వీకరిస్తూ ఆన్‌లైన్ బ్యాంకింగ్ సేవలపై పూర్తి అవగాహన పెంచుకున్నారు.  
​అంతేకాకుండా, ఒక మహిళగా తనకున్న ప్రాథమిక హక్కులు, డ్వాక్రా సంఘాల నియమ నిబంధనలు మరియు వినియోగదారుల హక్కుల పట్ల స్పష్టమైన అవగాహన పొంది సమాజంలో ధైర్యంగా నిలబడగలుగుతున్నారు. చదువు యొక్క ఆవశ్యకతను గుర్తించిన ఆమె పరిశుభ్రత, పోషకాహారం, వ్యాధుల నివారణ వంటి ఆరోగ్య సంరక్షణ విషయాలపై శ్రద్ధ వహిస్తూ, ప్రభుత్వ ఆసుపత్రులు, ఆశా వర్కర్ల సేవలను సద్వినియోగం చేసుకుంటున్నారు. తాను చదువుకోలేకపోయిన లోటును తీర్చుకోవడంతో పాటు, ఇప్పుడు తన పిల్లల విద్యాభ్యాసంపై ప్రత్యేక శ్రద్ధ చూపుతూ, ఇంట్లోనే వారికి చదువులో సహాయపడుతూ వారి ఉజ్వల భవిష్యత్తుకు బాటలు వేస్తున్నారు.  
​ఈ సందర్భంగా ఉమ మాట్లాడుతూ, తన జీవితంలో వచ్చిన ఈ గుణాత్మక మార్పుకు, సాధించిన సాధికారతకు కారణమైన 'ఉల్లాస్ - అక్షర ఆంధ్ర' కార్యక్రమానికి, కేంద్ర, రాష్ట్ర ప్రభుత్వాలకు హృదయపూర్వక కృతజ్ఞతలు తెలిపారు. "అక్షర జ్ఞానం - ఆత్మవిశ్వాసానికి బలం" అని నిరూపిస్తూ, ఆర్థికంగా, డిజిటల్‌గా, సామాజికంగా ఎదిగిన ఆమె ప్రయాణం గోయిది గ్రామంలోని తోటి మహిళలందరికీ ఎంతో స్ఫూర్తినిస్తోంది.