ఆర్టీసీ ఉద్యోగులను ప్రభుత్వంలో విలీనం చేయాలి: వాసిరెడ్డి సీతారామయ్య

సూర్య, మంచిర్యాల: 

ఆర్టీసీ ఉద్యోగులను ప్రభుత్వంలో విలీనం చేయాలని, ఆర్టీసీ సంస్థను పరిరక్షించి మరింత బలోపేతం చేయాలని ఏఐటీయూసీ రాష్ట్ర వర్కింగ్ ప్రెసిడెంట్ వాసిరెడ్డి సీతారామయ్య డిమాండ్ చేశారు. బుధవారం మంచిర్యాల ఆర్టీసీ డిపో గేట్ వద్ద నిర్వహించిన గేట్ మీటింగ్‌లో ఆయన మాట్లాడారు.

ఆర్టీసీ కార్మికుల సమస్యల పరిష్కారం, ఉద్యోగుల హక్కులు, ఉద్యోగ భద్రత, వేతనాలు, సంక్షేమం కోసం ఎంప్లాయిస్ యూనియన్ నిరంతరం పోరాడుతోందని ఆయన పేర్కొన్నారు. గుర్తింపు సంఘం ఎన్నికల్లో కార్మికులు ఎంప్లాయిస్ యూనియన్ బస్సు గుర్తుకు ఓటు వేసి గెలిపించాలని పిలుపునిచ్చారు. అలాగే టీఎంయూ యూనియన్ నిచ్చెన గుర్తుకు ఓటు వేసి గెలిపించాలని కోరారు.

కార్మికుల సమస్యలు ఎదురైన సమయంలో పట్టించుకోకుండా స్వప్రయోజనాల కోసం వివిధ పార్టీల వైపు వెళ్లే వారిని గుర్తింపు సంఘం ఎన్నికల్లో కార్మికులు తిరస్కరించాలని సీతారామయ్య అన్నారు. కార్మిక వర్గ ప్రయోజనాల కోసం నిబద్ధతతో పనిచేసే సంఘాలకు మద్దతు ఇవ్వాలని సూచించారు.

ఆర్టీసీ ప్రజా రవాణా వ్యవస్థలో కీలకమైన సంస్థ అని, దానిని ప్రైవేటీకరణ వైపు తీసుకెళ్లకుండా ప్రభుత్వం బలోపేతం చేయాల్సిన అవసరం ఉందన్నారు. ఆర్టీసీ ఉద్యోగులను ప్రభుత్వంలో విలీనం చేయడం ద్వారా ఉద్యోగులకు భద్రత కల్పించడంతో పాటు సంస్థను మరింత పటిష్టం చేయవచ్చని పేర్కొన్నారు.

గుర్తింపు సంఘం ఎన్నికల్లో కార్మికులు తమ హక్కులు, సమస్యలు, ఉద్యోగ భద్రత వంటి అంశాలను పరిగణనలోకి తీసుకుని నిర్ణయం తీసుకోవాలని ఆయన కోరారు.

ఈ కార్యక్రమంలో సీపీఐ జిల్లా కార్యదర్శి రామడుగు లక్ష్మణ్, ఏఐటీయూసీ జిల్లా ప్రధాన కార్యదర్శి మేకల దాసు, సింగరేణి కాలరీస్ వర్కర్స్ యూనియన్ డిప్యూటీ ప్రధాన కార్యదర్శులు కే. వీరభద్రయ్య, ముస్కే సమ్మయ్య, ఎస్.కే. బాజీ సైదా, కలిందర్ అలీ ఖాన్, జోగుల మల్లయ్య, లింగం రవి, సలేంద్ర సత్యనారాయణ, భీమనాదుని సుదర్శన్, దాగం మల్లేష్, ధోనికేన సమ్మయ్య, ఎంప్లాయిస్ యూనియన్ రీజినల్ అధ్యక్షుడు మామిడిపల్లి శ్రీనివాస్, డిపో అధ్యక్ష, కార్యదర్శులు రాజేశం, గోలి శంకర్, బొట్టు లక్ష్మన్ తదితరులు పాల్గొన్నారు.