జాతీయస్థాయి సాఫ్ట్‌బాల్‌లో మైథిలి సత్తా బంగారు పతకంతో మెరిసిన దాడితోట జడ్పీ ఉన్నత పాఠశాల విద్యార్థిని
అనంతపురం బ్యూరో : గ్రామీణ ప్రాంతానికి చెందిన ఓ విద్యార్థిని జాతీయస్థాయి సాఫ్ట్‌బాల్ పోటీల్లో అద్భుత ప్రతిభ కనబరిచి బంగారు పతకం సాధించి సత్తా చాటింది. తాడిమర్రి మండలం దాడితోట జడ్పీ ఉన్నత పాఠశాలలో పదో తరగతి చదువుతున్న వి. మైథిలి జాతీయస్థాయి సబ్‌జూనియర్ బాలికల సాఫ్ట్‌బాల్ ఛాంపియన్‌షిప్‌లో ఉత్తమ ప్రతిభ కనబరిచి గోల్డ్ మెడల్ సాధించడం పట్ల సర్వత్రా అభినందనలు వెల్లువెత్తుతున్నాయి.
గత నెలలో మహారాష్ట్రలోని ఛత్రపతి శంభాజీనగర్‌లో నిర్వహించిన సబ్‌జూనియర్ బాలికల సాఫ్ట్‌బాల్ ఛాంపియన్‌షిప్‌లో మైథిలి ప్రతిభ కనబరిచి రాష్ట్రానికి గర్వకారణంగా నిలిచిందని జిల్లా సాఫ్ట్‌బాల్ అధ్యక్ష, కార్యదర్శులు గాయత్రి, గంగమ్మ తెలిపారు.
ఘనంగా సన్మానం
జాతీయస్థాయి పోటీల్లో బంగారు పతకం సాధించిన మైథిలిని మంగళవారం ధర్మవరం తెలుగుదేశం పార్టీ ఇన్‌చార్జ్ ఘనంగా సన్మానించి అభినందించారు. గ్రామీణ ప్రాంతం నుంచి వచ్చి జాతీయస్థాయిలో ప్రతిభ చాటడం అభినందనీయమని, క్రీడల్లో మరింత ఉన్నత శిఖరాలను అధిరోహించాలని ఆకాంక్షించారు.
పాఠశాల ప్రధానోపాధ్యాయుడి అభినందనలు
మైథిలి సాధించిన విజయంపై దాడితోట జడ్పీ ఉన్నత పాఠశాల ప్రధానోపాధ్యాయులు ఉమామహేష్‌బాబు ప్రత్యేకంగా అభినందించారు. చదువుతో పాటు క్రీడల్లోనూ విద్యార్థులు రాణించేలా ప్రోత్సహించాల్సిన అవసరం ఉందని పేర్కొన్నారు. మైథిలి విజయం పాఠశాలకు, తాడిమర్రి మండలానికి గర్వకారణమని అన్నారు.
ఈ అభినందన కార్యక్రమంలో రాష్ట్ర సాఫ్ట్‌బాల్ అసోసియేషన్ సీఈవో సి. వెంకటేశులు, పీడీ జయలక్ష్మి, కాంతమ్మ, సీనియర్ క్రీడాకారుడు సింహాద్రి తదితరులు పాల్గొని మైథిలిని ప్రత్యేకంగా అభినందించారు.
జాతీయస్థాయిలో బంగారు పతకం సాధించిన మైథిలి.. భవిష్యత్తులో అంతర్జాతీయ వేదికపై కూడా దేశానికి ప్రాతినిధ్యం వహించి మరిన్ని పతకాలు సాధించాలని పలువురు ఆకాంక్షించారు.
