నేడు జాతినుద్దేశించి ప్రధాని మోదీ ప్రసంగం..

సూర్య జాతీయ డెస్క్: ప్రజాప్రతినిధిగా, రాజ్యాంగ అధినేతగా నిరంతరాయంగా 25 సంవత్సరాల పరిపాలనా కాలాన్ని దిగ్విజయంగా పూర్తి చేసుకున్న సందర్భంగా ప్రధానమంత్రి నరేంద్ర మోదీ నేడు జాతినుద్దేశించి ప్రసంగించనున్నారు. 2001 అక్టోబర్ 7న గుజరాత్ ముఖ్యమంత్రిగా తొలిసారి పదవీ బాధ్యతలు చేపట్టిన నాటి నుంచి ప్రధానిగా నేటి వరకు సాగిన తన పాతికేళ్ల ప్రజాసేవా ప్రస్థానం, సాధించిన మైలురాళ్లు మరియు భవిష్యత్ ‘వికసిత్ భారత్ 2047’ దార్శనికతపై ఆయన దేశ ప్రజలనుద్దేశించి కీలక సందేశం ఇవ్వనున్నారు.

మరోవైపు, ఈ చారిత్రక మైలురాయిని పురస్కరించుకుని ప్రధాని సొంత రాష్ట్రమైన గుజరాత్‌లో భారతీయ జనతా పార్టీ (BJP) భారీ ఎత్తున సంబరాలు, సేవా కార్యక్రమాలను చేపట్టింది. రాష్ట్రవ్యాప్తంగా అన్ని నియోజకవర్గాల్లో పవిత్ర ‘సేవా జ్యోతి కలశ యాత్ర’లను నిర్వహించనున్నట్లు గుజరాత్ బీజేపీ నాయకత్వం ప్రకటించింది. ప్రధాని మోదీ చేపట్టిన సుపరిపాలన, అభివృద్ధి మరియు సంక్షేమ ఫలాలను క్షేత్రస్థాయిలోకి తీసుకెళ్లే లక్ష్యంతో ఈ యాత్రలు సాగనున్నాయి.

ఈ యాత్రలో భాగంగా రాష్ట్రవ్యాప్తంగా రక్తదాన శిబిరాలు, ఉచిత ఆరోగ్య పరీక్షలు, పారిశుద్ధ్య కార్యక్రమాలు, మొక్కలు నాటే డ్రైవ్‌లతో పాటు ప్రముఖ పుణ్యక్షేత్రాలు, విద్యాసంస్థల్లో ప్రత్యేక ప్రార్థనలు, సదస్సులు నిర్వహించనున్నారు. సీఎం భూపేంద్ర పటేల్, గుజరాత్ బీజేపీ రాష్ట్ర అధ్యక్షుడు, కేంద్ర మంత్రులు, ఎంపీలు, ఎమ్మెల్యేలు ఆయా జిల్లాల్లో జరిగే కలశ యాత్రలలో ప్రత్యక్షంగా పాల్గొననున్నారు. పాతికేళ్ల నిరంతర ప్రజాసేవతో దేశ ముఖచిత్రాన్ని మార్చిన మోదీ నాయకత్వానికి కృతజ్ఞతగా గుజరాత్ ప్రజలు, పార్టీ శ్రేణులు ఈ ఉత్సవాల్లో ఉత్సాహంగా పాలుపంచుకుంటున్నారు.