21 కి.మీ ఎత్తులో డీఆర్‌డీవో హై-ఆల్టిట్యూడ్ ఎయిర్‌షిప్ పరీక్ష విజయవంతం:
సూర్య రక్షణ డెస్క్: రక్షణ పరిశోధన, అభివృద్ధి సంస్థ (DRDO) గగనతల నిఘా మరియు వ్యూహాత్మక సమాచార వ్యవస్థలో సరికొత్త చరిత్ర సృష్టించింది. దేశీయంగా పూర్తి స్వదేశీ పరిజ్ఞానంతో రూపొందించిన 'హై-ఆల్టిట్యూడ్ ప్లాట్‌ఫామ్ సిస్టమ్' (HAPS) ఆధారిత ఎయిర్‌షిప్‌ను స్ట్రాటోస్ఫియర్‌లో ఏకంగా 21 కిలోమీటర్ల (దాదాపు 69,000 అడుగులు) ఎత్తులో విజయవంతంగా పరీక్షించింది. ఈ మైలురాయితో సుదీర్ఘ కాలం పాటు గగనతలంలో నిలకడగా ఉంటూ నిఘా ఉంచగల అత్యాధునిక సాంకేతికత కలిగిన ఎంపిక చేసిన కొన్ని దేశాల సరసన భారత్ నిలిచింది.
డీఆర్‌డీవో పరిధిలోని ఏరియల్ డెలివరీ రీసెర్చ్ అండ్ డెవలప్‌‌మెంట్ ఎస్టాబ్లిష్‌మెంట్ (ADRDE-ఆగ్రా) ఈ హై-ఆల్టిట్యూడ్ ఎయిర్‌షిప్‌ను ప్రతిష్టాత్మకంగా అభివృద్ధి చేసింది. వాణిజ్య విమానాలు, సంప్రదాయ యుద్ధ విమానాలు ఎగరగలిగే పరిధికి ఎంతో ఎత్తున ఉండే స్ట్రాటోస్ఫియర్ వాతావరణంలో.. బలమైన గాలులు, విపరీతమైన శీతల ఉష్ణోగ్రతలను తట్టుకుని ఈ ఎయిర్‌షిప్ తన స్థానాన్ని స్థిరంగా నిలుపుకుంది. సౌరశక్తి మరియు అధునాతన బ్యాటరీల సహాయంతో పనిచేసే ఈ వ్యవస్థ, నిర్దేశిత ఎత్తులో రోజులు, వారాల తరబడి ఒకే ప్రాంతంపై నిరంతర నిఘా ఉంచే సామర్థ్యాన్ని కలిగి ఉంది.
ఈ ప్రయోగం దేశ భద్రతకు సరికొత్త రెక్కలు తొడిగిందని రక్షణ రంగ నిపుణులు విశ్లేషిస్తున్నారు. ఉపగ్రహాల మాదిరిగా అంతరిక్షంలో కాకుండా భూమికి సమీపంలోనే ఉంటూ సరిహద్దులు, తీరప్రాంతాల్లో శత్రువుల కదలికలను నిరంతరం పర్యవేక్షించడం (ISR), క్షిపణి ముందస్తు హెచ్చరికలు జారీ చేయడం మరియు సమాచార ప్రసారాల రిలే కేంద్రంగా ఇది పనిచేస్తుంది. ఉపగ్రహాల ప్రయోగంతో పోలిస్తే అత్యంత తక్కువ ఖర్చుతో కూడుకున్న ఈ ‘సూడో-శ్యాటిలైట్’ వ్యవస్థ.. సరిహద్దుల్లో సైనిక అవసరాలతో పాటు ప్రకృతి వైపరీత్యాల సమయాల్లో సహాయక చర్యలకు కూడా విప్లవాత్మకంగా ఉపయోగపడనుంది. ఈ చారిత్రక విజయం సాధించిన డీఆర్‌డీవో శాస్త్రవేత్తలు, సాంకేతిక బృందాలకు రక్షణ మంత్రిత్వ శాఖ ప్రత్యేక అభినందనలు తెలిపింది.
