ఉత్తరాఖండ్‌లో 4.9 తీవ్రతతో భూకంపం:
సూర్య జాతీయ డెస్క్: ఉత్తర భారతదేశంలో మంగళవారం రాత్రి బలమైన భూప్రకంపనలు సంభవించాయి. ఉత్తరాఖండ్ రాష్ట్రాన్ని కేంద్రంగా చేసుకుని రిక్టర్ స్కేలుపై 4.9 తీవ్రతతో సంభవించిన భూకంపం కారణంగా దేశ రాజధాని ఢిల్లీతో పాటు నేషనల్ క్యాపిటల్ రీజియన్ (Delhi-NCR) పరిసర ప్రాంతాల్లో భూమి స్వల్పంగా కంపించింది. ఉన్నట్టుండి భూమి కంపించడంతో భయాందోళనకు గురైన ప్రజలు ఇళ్లు, బహుళ అంతస్తుల భవనాల నుంచి రోడ్లపైకి పరుగులు తీశారు.
నేషనల్ సెంటర్ ఫర్ సిస్మాలజీ (NCS) వెల్లడించిన ప్రాథమిక వివరాల ప్రకారం.. ఉత్తరాఖండ్‌లోని పర్వత ప్రాంతంలో భూమికి దాదాపు 10 కిలోమీటర్ల లోతున ఈ భూకంప కేంద్రం నమోదైంది. ఉత్తరాఖండ్‌లోని చమోలీ, ఉత్తరకాశీ, రుద్రప్రయాగ్, డెహ్రాడూన్ తదితర జిల్లాల్లో ప్రకంపనల తీవ్రత స్పష్టంగా కనిపించింది. దీని ప్రభావంతో ఢిల్లీ, నోయిడా, గ్రేటర్ నోయిడా, గురుగ్రామ్, ఘజియాబాద్, ఫరీదాబాద్ ప్రాంతాల్లోని ఎత్తైన భవనాల్లోని ఫ్యాన్లు, గృహోపకరణాలు కొన్ని సెకన్ల పాటు ఊగిపోయాయి.
ఈ భూకంపం కారణంగా ప్రాణ, ఆస్తి నష్టాలకు సంబంధించి ఎలాంటి సమాచారం అందలేదని అధికారులు వెల్లడించారు. హిమాలయ పర్వత శ్రేణులు భూకంప తీవ్రత అత్యధికంగా ఉండే సిస్మిక్ జోన్-4 మరియు జోన్-5 పరిధిలోకి వస్తుండటంతో ఈ ప్రాంతంలో తరచుగా ఇలాంటి ప్రకంపనలు సంభవిస్తుంటాయని భూగర్భ శాస్త్రవేత్తలు తెలిపారు. పరిస్థితిని స్థానిక విపత్తు నిర్వహణ బృందాలు నిరంతరం పర్యవేక్షిస్తున్నాయని, ప్రజలు ఎలాంటి వదంతులను నమ్మవద్దని, అప్రమత్తంగా ఉండాలని అధికారులు సూచించారు.
